Google AirDrop-ын хаалтыг нээж, iPhone-руу шууд файл илгээх боломж нээв
Google дараагийн үеийн Pixel ухаалаг гар утаснууд дээр iPhone-руу зураг болон бусад төрлийн файлыг Apple-ийн AirDrop протоколыг ашиглан дамжуулах шинэ боломж нэвтрүүлж байгаагаа зарлалаа. Ингэснээр 10 гаруй жилийн турш зөвхөн Apple-ийн экосистемд “түгжигдсэн” байсан нэг онцгой боломж анх удаа Android тал руу нээгдэж байна.
AirDrop нь олон жилийн турш iOS, iPadOS, macOS системд гүн суурилсан, Apple-ийн төхөөрөмжүүдийн хооронд ойр зайд хурдан, утасгүй өгөгдөл дамжуулах үндсэн хэрэгсэл байсаар ирсэн. Харин Google үүний хариуд Android-д зориулсан Quick Share гэх ижил төстэй шийдлийг хөгжүүлж байгаа билээ. Одоо тус компани AirDrop протоколын өөрийн хэрэгжилтийг Apple-ээс ямар нэг албан ёсны оролцоо, зөвшөөрөл шаардахгүйгээр, ямар ч “тойрч гарах” арга ашиглалгүйгээр бүтээсэн гэж мэдэгдэв.
Google-ийн мэдэгдэлд:
“Гэр бүл, найз нөхөдтэйгээ мөчөө хуваалцах тухайд та ямар ч төхөөрөмжтэй байсан хамаагүй – дамжуулалт зүгээр л ажиллах ёстой”
гэж онцлон дурдсан байна.
Apple оролцоогүй, харин кибер аюулгүй байдлын багууд зөвшөөрчээ
Bloomberg-ийн мэдээлснээр Google-ийн төлөөлөгч Apple энэ хөгжүүлэлтийн аль ч шатанд оролцоогүй гэдгийг тодотгожээ. Гэсэн хэдий ч уг шинэ функцыг нэвтрүүлэхийн өмнө гадны кибер аюулгүй байдлын компани, мөн Google-ийн өөрийн аюулгүй байдлын багууд нарийвчлан тест хийсэн гэж тайлбарласан байна.
Google платформуудын аюулгүй байдал, нууцлал хариуцсан дэд ерөнхийлөгч Дэйв Клейдермахерийн хэлснээр холболт нь серверээр дамжин чиглэгдэхгүй, дамжуулж буй контент бүртгэгдэхгүй, нэмэлт өгөгдөл цуглуулахгүй, зөвхөн peer-to-peer буюу төхөөрөмж хоорондын шууд холболтоор ажиллахаар бүтээгджээ.
iPhone хэрэглэгчид яаж хүлээн авах вэ?
Android төхөөрөмжөөс файл хүлээн авахын тулд iPhone эзэмшигч тодорхой тохиргоо хийх шаардлагатай. Үүнд:
iPhone дээрээ AirDrop-ийн тохиргоог “Бүгд” горимд 10 минутын хугацаатайгаар идэвхжүүлэх ёстой. Энэ хугацаанд Pixel-ээс илгээж буй файлыг хүлээн авах эсэхийг хэрэглэгч өөрөө сонгох боломжтой бөгөөд илгээгчийн нэрээр хүсэлт гарч ирэх тул батлах, эсвэл татгалзах сонголттой байна.
Одоогийн байдлаар энэхүү шинэ боломж нь зөвхөн Pixel 10 ухаалаг гар утсан дээр ажиллаж байгаа бөгөөд бусад Android төхөөрөмжүүдэд хэзээ, яаж нэвтрэх нь хараахан тодорхой болоогүй байна.
“Хэрэглэгчийн ялалт”: платформ хоорондын хаалт багадав
Google энэ өөрчлөлтийг хэрэглэгчдийн хувьд том алхам, “ялалт” гэж тайлбарлаж байна. Учир нь одоо хэрэглэгчид ямар үйлдлийн систем ашиглаж байхаас үл хамааран хоорондоо файл хуваалцах боломж илүү бодитой, илүү энгийн болж байна.
Мөн компани Apple өнгөрсөн жил зохицуулагчдын шахалтаар iPhone-д нэвтрүүлсэн RCS мессежийн протоколын өөрчлөлтийг жишээ болгон дурдаж, платформ хоорондын хаалт багасч, илүү нээлттэй харилцах орчин бүрдэж байгаа ч энэ бүхнээс ашиг хүртэх нь хамгийн түрүүнд хэрэглэгчид гэж үзэж байна.
Өмнөх оролдлогууд хаалттай төгссөн, харин энэ удаа өөр байх уу?
Apple-ийн өмчийн функцуудыг гуравдагч талын компаниуд хуулбарлах, тойрч гарах оролдлого өмнө нь ч гарч байсан. Гэвч ихэнх нь богино хугацаанд хаагдаж, ажиллагааг нь зогсоож байлаа.
Ийм тохиолдолд 2023 онд iMessage-тэй ажиллахыг оролдсон Beeper үйлчилгээ, түүнчлэн iTunes-тэй нэгтгэгдэхийг эрт дээр үед туршсан Palm Pre зэрэг жишээг дурдаж болно. Эдгээр оролдлого Apple-ийн хатуу хаалт, экосистемийн бодлогод “таг зогссон” түүхтэй.
Google-ийн энэ шинэ санаачилга бол өмнөхөөсөө өөр – зөвхөн програмын заль мэх бус, AirDrop протоколын албан бус, өөрийн хэрэгжилт гэдгээрээ онцгой. Энэ нь цаашид платформ хоорондын өрсөлдөөн, зохицуулагчдын дарамт, хэрэглэгчийн эрх ашгийн тухай маргааныг дахин эрчимжүүлж болзошгүй байна.
