Хурлын микрофон ба хиймэл оюун ухааны дуут хандалтыг нэг төхөөрөмжид нэгтгэв
Powerrider компани GPT-4o дээр суурилсан хиймэл оюун ухааны функцтэй M1 ширээний микрофоноо үйлдвэрлэлд оруулах санхүүжилт босгохоор Kickstarter дээр олон нийтийн санхүүжилтийн кампанит ажлыг эхлүүлжээ. Төхөөрөмж нь хурал, зөвлөгөөний зориулалттай микрофоны боломжуудыг мэдрэлийн сүлжээнд дуут хандалттай нэгтгэсэн гэдгээрээ онцлог байна.
M1 микрофон 290 грамм жинтэй, 107 мм өндөртэй бөгөөд их бие нь хөнгөн цагаан хайлшаар хийгджээ. Микрофоны чиглэл тохируулах хэсэг 60 градусын дотор хөдөлгөөнтэй. Бүх чиглэлд ажилладаг конденсатор капсул нь 100–15,000 Гц давтамжийн хүрээнд 16 бит / 48 кГц түүвэрлэлтийн хурдтай ажиллахаар заасан байна. Мөн DSP суурилсан дуу чимээг бууруулах шийдэлтэй. Холболт нь USB-C портоор хийгдэх бөгөөд 3.5 мм-ийн чихэвчний залгууртай гэжээ.
Тусгай товчлуурууд, программын дэмжлэг, нэмэлт төхөөрөмжүүдийн төлөвлөгөө
Төхөөрөмжийн их биед өмчийн програм хангамжаар тохируулж болдог дөрвөн физик товчлуур байрлуулсан байна. Эдгээр нь хиймэл оюун ухаан, орчуулга, диктант, дуугүй болгох горимуудыг идэвхжүүлэх зориулалттай бөгөөд хэрэглэгч GPT-4o-той холбоотой өөрийн командуудыг товчлууруудад оноож болно гэж мэдээлжээ. Мөн эргэлдэгч товчлуур нь дууны хэмжээг тохируулах үүрэгтэй.
Програм хангамж нь Windows 7 болон түүнээс дээших хувилбарууд, мөн macOS 10.15 болон түүнээс дээших хувилбаруудыг дэмжинэ. Микрофоныг системүүд стандарт USB төхөөрөмж гэж таньж, OBS, Zoom зэрэг програмуудтай ажиллах боломжтой гэж танилцуулсан байна. Хийх боломжит функцүүдийн жагсаалтад текст орчуулах, танилцуулга болон зураг үүсгэх, баримт бичиг шинжлэх, код үүсгэх, дэлгэцийн агшин боловсруулах зэрэг оржээ.
Powerrider мөн GPT-4o интеграцтай K1 гар, S1 хулгана хөгжүүлж буйгаа дурдсан байна. K1 нь RGB арын гэрэлтүүлэгтэй, гурван макро товчлууртай 98 товчлуурын механик загвар гэжээ. S1 хулгана утастай болон утасгүй горим дэмжих бөгөөд долоон товчлуур, 4000 DPI хүртэлх мэдрэгчээр тоноглогдсон байна.
Анхны худалдан авагчдад зориулсан M1 микрофон 59 ам.долларын үнээр санал болгож байгаа бөгөөд гурван төхөөрөмжийн бүрэн багцыг 269 ам.доллараар худалдахаар мэдээлжээ. Кампанит ажил хэдэн долоо хоног үргэлжлэхээр төлөвлөгдсөн байна.
