Nubia компанийн нэр хүндтэй RedMagic цуврал шинэ шатанд гарч, RedMagic 10S Pro нэртэй, цоо шинэ тоглоомын гар утсыг дэлхийн зах зээлд танилцууллаа. Энэхүү төхөөрөмж нь зөвхөн “тоглоом тоглох утас” биш, харин ширээний PC-ийн технологийг алгандаа багтаасан хүчирхэг төхөөрөмж юм.
RedMagic 10S Pro нь Snapdragon 8 Elite нэртэй хэт өндөр давтамжтай шинэ чиптэй бөгөөд CPU нь 4.47 ГГц, GPU нь 1.2 ГГц хүрсэн үзүүлэлттэй. Хиймэл оюун ухааны тооцооллыг хариуцдаг NPU нь 40%-иар сайжирсан бол компанийн өөрийн RedCore R3 Pro чип нь график 120 fps хүргэж, мэдрэгчид болон хөргөлтөд тусалдаг.
6.85 инчийн OLED дэлгэцтэй энэхүү төхөөрөмж нь 2688×1216 пикселийн нарийвчлалтай, 144 Гц-ийн сэргээгдэх хурдтай. Хуруу мэдрэгчийн хариу үйлдэл 2500 Гц хүрдэг нь хамгийн хурдан мэдрэгчийн нэг юм.
Батарей нь асар том — 7050 мА/ц бөгөөд 80 Вт хурдан цэнэглэлтийг дэмждэг. Хэт халалт үүсгэхгүй байх үүднээс 23,000 эрг/мин хурдтай RGB гэрэлтэй сэнс, шингэн металл хөргөлтийн хавтан, 12,000 мм² уурын камер, графен ба зэсний давхаргууд ашигласан нарийн хөргөлтийн системтэй.
Камерууд ч бас тоглоомчдод зориулсан стандарт хангасан байна. Арын хэсэгт 50 МП гол камер (OV50E, OIS), 50 МП хэт өргөн модуль, мөн 2 МП туслах мэдрэгч багтсан бол, 16 МП урд камер нь дэлгэцийн доор байрлана.
Төхөөрөмжийн хэмжээ 163.4×76.1×8.9 мм, жин нь 229 грамм. RedMagic OS 10.5 үйлдлийн системтэй бөгөөд Android 15 дээр суурилсан. Түүнчлэн 4D вибраци, DTS:X аудиотой стерео чанга яригч, 520 Гц мэдрэмжтэй физик триггер товч, MagicKey тоглоомын тусгай горимын товчлуур зэрэг нэмэлт боломжуудтай.
Загвар ба үнэ:
- 12GB RAM + 256GB – $700
- 16GB RAM + 512GB – $850
- 24GB RAM + 1TB – $1000
Шинэ загвар Nightfall, Moonlight, Dusk гэх гурван өнгөний сонголттой. Глобал худалдаа 6-р сарын 18-нд эхэлнэ, харин түүнээс өмнө урьдчилсан захиалга хүлээн авна.
