“Samsung” компани гадаад зөөврийн твердотөлөвт шинэ санах ойгоо T7 Resurrected Portable Solid State Drive (PSSD) нэрээр албан ёсоор танилцууллаа. Шинэ цувралд 1, 2 болон 4 ТБ багтаамжтай гурван янзын хувилбар багтаж байгаа бөгөөд компани энэхүү бүтээгдэхүүнээ өндөр хурд, бат бөх байдал, байгальд ээлтэй шийдлээрээ онцолж байна.
100 хувь дахин боловсруулсан хөнгөн цагаан корпустай “ногоон” SSD
T7 Resurrected цувралын хамгийн онцгой шийдэл нь корпуст ашигласан материал юм. “Samsung”-ийн мэдээлснээр эдгээр зөөврийн SSD-ийн гадна бүрхүүл нь 100 хувь дахин боловсруулсан хөнгөн цагаанаар хийгдсэн бөгөөд уг металлыг Galaxy цувралын ухаалаг төхөөрөмж үйлдвэрлэх явцад үлдсэн материалуудаас гарган авсан байна.
Мөн корпуст будаг ашиглаагүй тул хөнгөн цагааны байгалийн гялбааг тэр чигээр нь хадгалсан загвартай. Ингэснээр химийн бодисын хэрэглээг бууруулж, үйлдвэрлэлийн процессыг илүү оновчтой болгосон гэж үзэж байна. Сав баглаа боодлын хувьд ч ялгаагүй 100 хувь дахин боловсруулсан цаас ашиглаж, хэвлэлд нь шар буурцагт (соё) суурилсан бэх хэрэглэжээ.
Ийм байдлаар тогтвортой хөгжил, эрчим хүчний үр ашигт чиглэсэн шийдлүүдээрээ T7 Resurrected зөөврийн SSD нь CES 2026 үзэсгэлэнгийн “Innovation Award” шагналын “Тогтвортой хөгжил ба эрчим хүч хэмнэлт” гэсэн ангилалд шалгарсан байна.
1050 МБ/с хүртэлх унших хурдтай өндөр үзүүлэлт
Гадна хийцээс гадна техникийн үзүүлэлт талаасаа ч T7 Resurrected өмнөх үеийн T7 цувралын түвшинг алдаагүй, өндөр хурдтай хэвээр байна. Samsung-ийн мэдээлж буйгаар, энэ зөөврийн SSD нь дараалсан унших хурд 1050 МБ/с, дараалсан бичих хурд 1000 МБ/с хүртэл хүрэх боломжтой. Өндөр хурдыг хангахын тулд USB 3.2 Gen 2 интерфэйсийг ашигладаг.
Хэмжээний хувьд 85×87×8 мм буюу маш нимгэн, авсаархан биетэй, ердөө 72 грамм жинтэй. Компани бүтээгдэхүүнээ өдөр тутмын зөөврийн хэрэглээнд тохируулан цохилт даах чадвар өндөртэй болгон бүтээжээ. Үйлдвэрлэгчийн баталснаар T7 Resurrected нь хоёр метр өндөртэй газраас унах ачааллыг даахуйц бат бөх корпус бүхий загвартай.
Мэдээллийн аюулгүй байдлын хувьд төхөөрөмж 256-битийн AES аппаратын шифрлэлтийг дэмждэг ба энэ нь хувийн болон ажил хэргийн чухал файлуудаа шууд төхөөрөмж дээрээ хамгаалах боломжтой гэсэн үг юм.
Өргөн нийцтэй байдал ба үнэ
Samsung T7 Resurrected зөөврийн SSD нь зөвхөн компьютер төдийгүй төрөл бүрийн ухаалаг төхөөрөмжид ашиглахад зориулагдсан. Тодруулбал, ухаалаг гар утас, таблет, тоглоомын консол зэрэг төхөөрөмжүүдтэй ажиллах боломжтой бөгөөд албан ёсоор Android, Windows, macOS үйлдлийн системүүдийг дэмжиж байгаа гэж компани дурджээ.
Шинэ зөөврийн SSD-үүдийг 11 дүгээр сарын 30-наас худалдаанд гаргаж эхэлсэн бөгөөд АНУ-ын зах зээл дээрх жишиг үнийг дараах байдлаар зарласан байна.
1 ТБ багтаамжтай хувилбар 119.99 ам.доллар,
2 ТБ багтаамжтай хувилбар 205.99 ам.доллар,
4 ТБ багтаамжтай хувилбар 378.99 ам.долларын үнэтэй байх аж.
Ингэснээр T7 Resurrected нь байгальд ээлтэй материал, тогтвортой үйлдвэрлэл, өндөр гүйцэтгэл, авсаархан загварыг нэгтгэсэн, Samsung-ийн зөөврийн SSD-үүдийн шинэ үеийг нээж буй бүтээгдэхүүн болж байна.
