Дистрибьютерүүд санах ойн үнийг урьд байгаагүйгээр өсгөж эхэллээ
Samsung-ийн санах ойн бүтээгдэхүүн түгээгч дистрибьютерүүд модулиудын үнийг өмнө нь байгаагүйгээр, 80 хувь хүртэл нэмэгдүүлж буйгаа мэдэгдлээ. Тэд энэ алхмыг DRAM үйлдвэрлэлийн өсөлт хязгаарлагдмал, NAND санах ойн гарц хумигдсан нөхцөл байдалтай холбон тайлбарлаж байгаа бөгөөд эрэлт өндөр хэвээр байгаа учраас салбар даяар үнийн хуйвалдаан өрнөх эрсдэл нэмэгдэж байна.
Саяхан олон нийтийн сүлжээгээр цацагдсан баримт бичигт дурдсанаар Samsung-тэй холбоотой дистрибьютер, дилерүүд санах ойн төрөл бүрийн бүтээгдэхүүний үнийг богино хугацаанд 80 хувь хүртэл өсгөж эхэлсэн тухай мэдээлжээ.
Үнийн өсөлт тэр даруй хэрэгжиж, албан дилер мэдэгдэл гаргав
Samsung-ийн эрх бүхий нэгэн дилер ойрын хугацаанд гаргасан мэдэгдэлдээ санах ойн бүтээгдэхүүний үнийг 80 хувь хүртэл огцом нэмэгдүүлж буйгаа зарласан бөгөөд шинэ үнийн түвшин шууд хүчин төгөлдөр болохыг онцолсон байна.
Эдгээр үнийн өөрчлөлтийг хараахан бие даан нягталж баталгаажуулж чадаагүй байгаа ч Өмнөд Солонгосын Гихёнг дахь Samsung Electronics-ийн Төхөөрөмжийн шийдлийн кампусын ерөнхий нэр болох DS Giheung-д ажилладаг нэгэн эх сурвалжийг уг мэдээллийн гол эх гэж нэрлэжээ.
Хязгаарлагдмал үйлдвэрлэл эрэлттэй хавсарснаар нийлүүлэлт шахагдав
Samsung энэ жил DRAM санах ойн гарцыг ердөө таван хувиар л нэмэгдүүлэх төлөвлөгөөтэй байгаа нь эрэлт өсөж, нийлүүлэлтийн түвшинд дарамт нэмэгдэж, зах зээлд тасалдал, хомсдол илүү түгээмэл болох шалтгаан болж байна.
Хиймэл оюун ухааны хөгжилтэй холбоотой өндөр хүчин чадалтай санах ойн, ялангуяа HBM бүтээгдэхүүний эрэлт сүүлийн жилүүдэд огцом өссөн нь зах зээлийн хэт халалтад хүрэх вий гэсэн болгоомжлолыг төрүүлсэн. Зарим шинжээчдийн үзэж байгаагаар энэ эргэлзээ эрэлт өсөлтийн хурд бага зэрэг саарсны дараа улам тод мэдрэгдэж байгаа ч үнийн хуйвалдааны шинжтэй хөдөлгөөн нь Samsung, SK hynix, Micron зэрэг гол тоглогчдын нийлүүлэлтийн стратегид мэдэгдэхүйц нөлөөлсөн байх магадлал өндөр байна. Эдгээр компани бүгд үйлдвэрлэлээ тэлэхдээ маш болгоомжтой, анхааралтай хандсаар байна.
NAND үйлдвэрлэлийг танаж, нөөцөө DRAM руу чиглүүлж байна
Нөхцөл байдал зөвхөн DRAM бүтээгдэхүүнээр хязгаарлагдахгүй байна. Өмнө нь гарсан мэдээллээр Samsung болон SK hynix компаниуд NAND санах ойн үйлдвэрлэлээ бууруулах боломжийг идэвхтэй хэлэлцэж байгаа бөгөөд DRAM-ийн ашигт ажиллагаа өндөр байгаа нь NAND үйлдвэрлэлийн шугамуудаас нөөц, хүчин чадлыг DRAM тал руу шилжүүлэх түлхэц болж байгаа аж.
Ингэснээр зах зээл дээрх нийт санах ойн нийлүүлэлт илүү хязгаарлагдмал болж, үнийн дарамтыг улам гааруулж болзошгүй байна.
Зах зээлийн хэмжээ тэсрэлттэй өсөх төлөвтэй, үнийн хуйвалдааны эрсдэл нэмэгдэнэ
Trend Force-ийн тооцооллоор дэлхийн санах ойн салбарын нийт зах зээлийн үнэлгээ 2026 онд 551.6 тэрбум ам.долларт хүрч, 2027 он гэхэд 842.7 тэрбум ам.доллар болж өсөх төлөвтэй байна. Ингэснээр жилийн нийлмэл өсөлтийн хурд 53 хувиас давна гэж гарчээ.
Ийм өндөр өсөлтийн хүлээлттэй, эрэлт хүчтэй, үйлдвэрлэл хязгаарлагдмал орчинд ирэх саруудад ханган нийлүүлэгчид үнийн хуйвалдаан хийх орон зай, боломж улам олширно гэж шинжээчид анхааруулж байна. Samsung болон түүний өрсөлдөгчдийн өнөөгийн болгоомжтой стратеги нь богино хугацаанд хэрэглэгчдэд өндөр үнэ, урт хугацаанд зах зээлийн эрсдэлийг нэмэгдүүлэх төлөвтэй байна.
