Санах ойн үнийн огцом өсөлт Samsung-ийг шинэ технологийн эдийн засгийн гол тоглогчдын нэг болгож эхэллээ
Samsung ойрын жилүүдэд дэлхийн хамгийн өндөр ашигтай компаниудын нэг болж, бүр NVIDIA-гаас ч давж магадгүй гэсэн үнэлгээ улам хүчтэй яригдаж байна. Хиймэл оюуны зах зээл хурдацтай тэлж, санах ойн үнэ өссөөр байгаа энэ үед Өмнөд Солонгосын технологийн аварга компани шинэ эдийн засгийн төв тоглогчдын нэг болж хувирч байна.
Шинжээчдийн тооцооллоор Samsung-ийн 2026 оны эхний улирлын үйл ажиллагааны ашиг 42 тэрбум ам.долларт ойртож магадгүй байгаа аж. Хэрэв энэ тооцоо бодит үзүүлэлттэй ойролцоо гарвал компанийн ашиг өнгөрсөн оны мөн үеийнхээс 700 гаруй хувиар өссөн гэсэн үг болно. Тэр ч байтугай Samsung ганцхан улиралд 2025 оны нийт ашгаасаа давсан орлого олсон гэж дүгнэх хэмжээнд хүрчээ.
Энэ өсөлтийн гол хөдөлгөгч хүч нь хагас дамжуулагчийн санах ойн зах зээл хэвээр байна. Ялангуяа DRAM болон хиймэл оюуны системд шаардлагатай өндөр хурдны санах ойн эрэлт буурахгүй, харин ч улам нэмэгдсээр байгаа нь үнийг тасралтгүй өсгөж байна. Салбарын шинжээчдийн үзэж байгаагаар одоогийн өсөлтийн мөчлөг дөнгөж дунд шатандаа явж байгаа бөгөөд цаашид ашиг нэмэгдэх нөөц хэвээр байгаа аж.
2026, 2027 онд Samsung-ийн ашиг шинэ түвшинд хүрч, NVIDIA-гийн үзүүлэлттэй өрсөлдөх төлөвтэй байна
Хамгийн өөдрөг төсөөллөөр бол Samsung 2026 онд ойролцоогоор 221 тэрбум ам.долларын ашиг олох боломжтой гэж үзэж байна. Харин 2027 онд энэ тоо 330 тэрбум ам.долларт хүрч магадгүй гэсэн таамаг ч гарчээ. Хэрэв ийм дүр зураг бодит байдалд ойртвол Samsung тухайн хугацаанд NVIDIA-гийн хүлээгдэж буй ашгийг давж, дэлхийн хамгийн ашигтай корпорацийн байр сууринд хүрэх зам нээгдэх юм.
Сонирхолтой нь, зах зээлийн үнэлгээгээрээ Samsung одоогоор NVIDIA-гаас нэлээд хоцорч байгаа. Гэвч хиймэл оюуны эргэн тойрон дахь өнөөгийн “алтны халуурал”-ын үед хамгийн их ашиг хүртэж буй нь зөвхөн эцсийн бүтээгдэхүүн үйлдвэрлэгчид биш, харин санах ой зэрэг гол бүрэлдэхүүн хэсгийг нийлүүлэгчид болж байна. Өөрөөр хэлбэл, Samsung зах зээлийн бүх тоглогчдод “хүрз” зарж буй компанийн байр сууринд очоод байна гэсэн үг юм.
Ийнхүү ШИ-ийн эрэлт, санах ойн үнийн өсөлт, үйлдвэрлэлийн хүчирхэг суурь гэсэн гурван хүчин зүйл Samsung-ийг ойрын жилүүдэд дэлхийн хамгийн ашигтай компаниудын оргилд гаргах бодит боломж болж харагдаж байна.
