Хиймэл оюун ухаан өдөр тутмын амьдрал, бизнес, шинжлэх ухаан, бүтээлч салбарт улам өргөн нэвтэрч байна. Үүний хэрээр хэрэглэгчдийн оролцоо нэмэгдэж, ШИ хөгжүүлэхэд шаардлагатай өгөгдлийг хүмүүс өөрсдөө бий болгож байгаа нь анзаарагддаггүй ч бодит үзэгдэл юм.
Энгийн хэрэглээний явцад хүмүүс алгоритмд мэдээлэл өгч, түүнийг сайжруулахад хувь нэмэр оруулдаг. Нийгмийн сүлжээнд контент үзэх, дуу хоолой таних системийг засах, текстийн автоматаар бөглөх функцийг ашиглах зэрэг нь бүгд ШИ-г “сургаж” байдаг. Гэхдээ үүнээс илүү сонирхолтой, төдийлөн анзаарагддаггүй аргууд ч бий.
1. CAPTCHA — компьютер харааг хөгжүүлдэг
CAPTCHA нь вэбсайтад хүн эсэхийг шалгах зорилготой тест боловч цаанаа илүү өргөн үүрэгтэй.
Хэрэглэгчдээс:
- машин
- зам
- гэрлэн дохио зэрэг объектыг зураг дээрээс ялгахыг хүсдэг.
Эдгээр зураг нь Google Street View-ээс авсан мэдээлэл байдаг бөгөөд зөв сонголтууд нь компьютер харааны алгоритмыг сайжруулдаг. Энэ технологийг Waymo зэрэг компаниуд өөрөө жолоодлоготой автомашинд ашиглаж байна.
2. Pokémon Go — роботуудад зориулсан газрын зураг бүтээдэг
2016 онд гарсан Pokémon Go тоглоом нь GPS болон нэмэгдсэн бодит байдлыг ашиглан бодит орчныг дижитал хэлбэрт оруулсан.
Олон сая хэрэглэгч:
- байршил
- орчны бүтэц
- хөдөлгөөний замнал
зэрэг мэдээллийг бүрдүүлж, нарийвчилсан газрын зураг үүсгэхэд оролцсон.
Энэ өгөгдөл дээр үндэслэн:
- робот хүргэлтийн системүүд
- навигацийн алгоритмууд
хөгжиж, Coco Robotics зэрэг компаниуд ашиглаж эхэлсэн.
3. Спам мэдээлэх — имэйлийн хамгаалалтыг сайжруулдаг
Имэйл дээр “спам” гэж тэмдэглэх үйлдэл нь зөвхөн өөрийн inbox-ийг цэвэрлэх биш юм.
Энэ үйлдлээр:
- машин сургалтын алгоритм
- фишинг илрүүлэх систем
илүү нарийвчлалтай болж, ижил төрлийн имэйлүүдийг автоматаар шүүдэг.
Сүүлийн жилүүдэд фишинг халдлага эрс нэмэгдэж, генератив ШИ ашигласан залилан илүү үнэмшилтэй болсон тул хэрэглэгчдийн ийм оролцоо хамгаалалтын системд шууд нөлөөлж байна.
