Хиймэл оюун ба зохиогчийн эрхийн маргаан хурцдаж байна
Хиймэл оюунаар дуу, хөгжим бүтээх хэрэглээ өсөхийн хэрээр зохиогчийн эрхтэй бүтээлүүдийг зөвшөөрөлгүйгээр сургалт, үйлдвэрлэлийн процесст ашиглах эрсдэл салбарынхны анхаарлын төвд орлоо. Энэ асуудал уран бүтээлчдийн эрх ашгийг хөндөж буй тул “Sony” компани хиймэл оюунаар үүсгэсэн хөгжмийн гарал үүслийг тогтоох шинэ технологио олон нийтэд танилцуулжээ.
Технологи нэвтэрснээр нөхөн төлбөр нэхэмжлэх боломж нэмэгдэнэ
“Sony” группийн мэдээлснээр уг шийдэл бодитоор хэрэгжвэл хөгжмийн зохиолч, дууны үг зохиогч, мөн нийтлэгчид бүтээлийг нь зөвшөөрөлгүй ашигласан хиймэл оюун хөгжүүлэгчдээс нөхөн төлбөр шаардах эрх зүйн боломжоо илүү тодорхой болгох юм байна.
Эх загварын өгөгдөлтэй тулгаж, үүссэн хөгжмийг шалгана
Технологийн зарчим нь хиймэл оюуны үндсэн загварт ашиглагдсан өгөгдлөөс холбогдох мэдээллийг татан авч, шинээр үүсгэсэн хөгжмийг тухайн эх сурвалжуудтай нь харьцуулахад чиглэжээ. “Уран бүтээлчид хөдөлмөрөө бодитоор үнэлүүлдэг шударга тогтолцоог бүрдүүлэхэд бид хувь нэмрээ оруулахыг зорьж байна” гэж “Sony” группийн энтертайнмент хариуцсан хэвлэлийн төлөөлөгч мэдэгдсэн байна.
Контент хамгаалах бодлого өмнө нь ч хатуу хэрэгжиж байсан
“Sony” компани контент хамгаалах чиглэлд сүүлийн жилүүдэд байр сууриа тогтвортой баримталж ирсэн гэж онцолжээ. Тухайлбал, 2024 онд АНУ дахь “Sony Music Entertainment” хиймэл оюуны хөгжүүлэлтэд хөгжим зөвшөөрөлгүй ашигласан гэх үндэслэлээр нэгэн технологийн компанийг шүүхэд өгч байсан мэдээлэл бий.
