Sony корпораци санхүүгийн нэгдсэн тайлангаа танилцуулж, PlayStation 5 (PS5) консолын нийт борлуулалт 80.2 сая ширхэгт хүрснийг мэдэгдлээ. Энэ тоо баримт нь 2025 оны 6-р сарын 30-ны байдлаар гарсан бөгөөд зөвхөн санхүүгийн 2025-2026 оны эхний улиралд (4-р сараас 6-р сар) 2.5 сая PS5 төхөөрөмж тээвэрлэгдсэн байна.
Борлуулалт, идэвхтэй хэрэглэгчийн тоо тогтвортой өсөв
Sony-ийн тоглоомын болон сүлжээний үйлчилгээний сегмент (PlayStation болон PlayStation Network орно) энэ улиралд 936.5 тэрбум иен (~6.46 тэрбум ам.доллар)-ын орлоготой ажилласан нь өмнөх оны мөн үетэй харьцуулахад 8%-иар өссөн үзүүлэлт бөгөөд нэмэгдэл нь анхны бус тоглоомуудын болон нэмэлт контентуудын борлуулалтын өсөлттэй холбоотой гэж тайлбарлажээ.
Түүнчлэн PlayStation Network-ийн сар бүрийн идэвхтэй хэрэглэгчийн тоо 2024 оны зургадугаартай харьцуулахад 7 саяаар нэмэгдэж, 123 саяд хүрсэн бол PS4 ба PS5 системүүдэд нийт 65.9 сая тоглоом худалдаалагдсан нь өмнөх оноос 12.3 саяар нэмэгджээ.
Эдгээр өсөлтүүд нь компанийн үйл ажиллагааны орлогыг 148 тэрбум иен (~1.02 тэрбум ам.доллар) болгон өсгөсөн ба энэ нь 127%-ийн өсөлт юм. Орлогын өсөлт нь зөвхөн техник хангамжийн борлуулалт бус, идэвхтэй хэрэглэгчдийн өсөлт, програм хангамжийн худалдан авалттай холбоотой.
2.5 сая PS5 төхөөрөмжийн борлуулалт нь магадгүй Nintendo Switch 2-ын үзүүлэлттэй харьцуулахад бага байж болох ч тав дахь жилдээ орж буй платформд хэрэглэгчдийн сонирхол хэвээр байгааг харуулж байна.
Sony Esports-т илүү хүчтэй нэвтрэж байна
Sony энэ улиралд Esports салбарт өөрийн оролцоог өргөтгөх алхамуудыг авч хэрэгжүүлжээ. Тухайлбал:
- Tekken 8 тоглоомыг хариуцдаг Bandai Namco компанитай стратегийн түншлэл байгуулсан.
- Evo 2025 арга хэмжээний үеэр Marvel Tōkon: Fighting Souls нэртэй FGC (Fighting Game Community) тоглоомын тоглож үзэх боломжтой демо хувилбар танилцуулав.
- Энэхүү тоглоомын зэрэгцээ FGC-д зориулагдсан анхны joystick болох FlexStrike-ийг танилцуулсан.
- Мөн INZONE брэндээрээ дамжуулан VALORANT Champions Tour EMEA тэмцээний олон жилийн түншлэлийг үргэлжлүүлэн баталгаажуулсан. Уг брэнд нь өмнө нь Cloud9 багтай хийсэн Call of Duty League-ийн гэрээгээр олонд танигдсан.
Sony-ийн эдгээр алхмууд нь тоглоомын борлуулалтаас гадна өрсөлдөөнт тоглоомын экосистем дэх байр сууриа бэхжүүлэх, хэрэглэгчидтэй шууд харилцах стратегийг тодорхой илэрхийлж байна.
