Хөгжмийн стриминг платформ Spotify хэрэглэгчид хоорондоо шууд харилцах боломжтой мессенжерийн шинэ функцийг танилцуулжээ. Энэ нь зөвхөн найз нөхөддөө дуртай дуугаа илгээх энгийн чат биш, харин хамтдаа сонссон түүхийг хадгалах нэмэлт боломж гэж компанийн зүгээс тодотгож байна.
Шинэ систем нь уран бүтээлчдэд ч ашигтай гэж үзэж байгаа бөгөөд сонсогчидтой илүү ойр дотно харилцаа үүсгэж, шүтэн бишрэгчдийн хүрээг өргөжүүлэхэд тусална.
Өмнө нь хэрэглэгчид дуу, подкаст, тоглуулах жагсаалтаа гуравдагч талын мессенжерээр дамжуулан илгээдэг байсан бол одоо Spotify дээрээсээ шууд хуваалцах боломжтой. Үүний тулд сонсож буй контент дээрх “Хуваалцах” товчийг дарж, “Илгээх” гэсэн сонголтыг хийхэд хангалттай.
Эхний удаад харилцагч хүсэлтийг баталгаажуулах шаардлагатай бөгөөд энэ нь спам мессежээс хамгаалах зорилготой. Дараа нь хэрэглэгчид Spotify-ийн ямар ч контентыг мессежээр дамжуулан илгээж, чат үүсгэхийн зэрэгцээ энгийн мессеж бичих, эможигоор хариу өгөх боломжтой болно.
Харилцсан бүх мессеж хэрэглэгчийн профайлын “Мессеж” хэсэгт хадгалагдана. Spotify мэдээллийг шифрлэж дамжуулдаг ч платформын дүрмийн хяналтыг хийхийн тулд төгсгөлөөс төгсгөл хүртэлх шифрлэлтийг ашигладаггүй.
Энэхүү шинэ боломжийг ойрын өдрүүдэд бүх хэрэглэгч ашиглах боломжтой болох ажээ.
