Таны Wi-Fi-гийн дайсан нь чиглүүлэгч биш, гэрийн орчин байж болно
Wi-Fi тогтворгүй, хурд нь унаад байхад хүмүүс ихэвчлэн үйлчилгээ үзүүлэгч, чиглүүлэгчээ буруутгадаг. Гэтэл энгийн гэрийн сүлжээний хувьд асуудлын гол шалтгаан нь байшингийн бүтэц, өрөөний төлөвлөлт байдаг. Бетон, тоосгон хана, нягт тавилга, цахилгаан хэрэгсэл, металл эд зүйлс нь долгионыг шингээж, саатуулснаар дохио хүрдэггүй “үхмэл бүс” үүсгэдэг.
Чиглүүлэгчийн буруу байрлал Wi-Fi-гийн гол алдаа
Ихэнх тохиолдолд асуудал нь төхөөрөмжийн чанарт биш, хаана байрлуулсанд оршдог. Хэрвээ чиглүүлэгчийг шүүгээн дотор нууж, шалан дээр орхиж эсвэл шкаф, буйдан, тавилгаараа хааж байрлуулбал дохио шууд муудна. Хамгийн оновчтой байрлал нь орон сууцны төв хэсэг, саад багатай, арай өндөр цэг байдаг. Харин том талбай, олон өрөөтэй байрны хувьд нэг чиглүүлэгчээс гадна давтагч эсвэл торон (mesh) сүлжээ ашиглах нь хамрах хүрээг мэдэгдэхүйц сайжруулдаг.
Танай гэрийн цахилгаан хэрэгсэл Wi-Fi-тай “дайн” зарлаж байдаг
Wi-Fi нь зөвхөн хана, тавилгаараа биш, ижил давтамж ашигладаг бусад төхөөрөмжөөр ч тасалддаг. Богино долгионы зуух, хүүхдийн радио хяналтын төхөөрөмж, утасгүй камер, Bluetooth дагалдах хэрэгсэл зэрэг нь сүлжээний дохиог будлиулдаг. Мөн том хэмжээний металл эд зүйлс, толь, “low-e” буюу эрчим хүч хэмнэдэг бүтэн шилэн цонх, том аквариумууд нь дохиог ойруулж, ойлгож, сулруулдаг. Орон сууцны барилгын хувьд хөршийн чиглүүлэгчүүд, зурагт, олон сүлжээ давхарлан ажилласнаар нэмэлт чимээ, саад үүсдэг.
Зардал нэмэхгүйгээр Wi-Fi-гаа хэрхэн тогтвортой болгох вэ?
Wi-Fi-гийн чанарыг сайжруулахын тулд заавал шинэ, үнэтэй чиглүүлэгч авах шаардлагагүй. Юуны өмнө чиглүүлэгчээ аль болох нээлттэй, өндөр, төвд ойр байрлуулж, түүний ойр орчимд дохио хааж, саатуулж болзошгүй зүйлсийг багасгах хэрэгтэй. Ингэснээр илүү тогтвортой сүлжээ, өргөн хамрах хүрээг нэмэлт зардалгүйгээр авах боломжтой бөгөөд тасалдах, сигнал алдах асуудал мэдэгдэхүйц багасна.
