“Та мөнгө хожлоо” гэх мессежинд хууртагдаж 3.3 сая төгрөгөө алдсан хэрэг бүртгэгджээ

Хуурамч банкны логотой хаягаар чатанд тарааж байна

Сүүлийн үед олон нийтийн цахим сүлжээ, ялангуяа фэйсбүүк чатаар нэр бүхий банкны логотой хаягаас “Та мөнгө хожлоо, банкны нууц үгээ оруулж мөнгөө аваарай” гэх агуулгатай хуурамч мэдээлэл тархаж, иргэд залилуулан мөнгөө алдах тохиолдол нэмэгдэж байгаа талаар мэдээллээ.

2026.01.03-нд 3,300,000 төгрөгийн хохирол гарчээ

Тодруулбал, энэ сарын 03-ны өдөр нэгэн иргэн дээрх мэдээлэлд итгэн дансны нууц үгээ оруулсны улмаас 3,300,000 төгрөгөө алдаж хохирсон тохиолдол бүртгэгдсэн байна.

Цагдаагаас анхаарууллаа

Цагдаагийн байгууллагаас ийм төрлийн мессеж ирвэл эх сурвалжийг сайтар нягтлах, үл мэдэх линк дээр дарахгүй байх, хувийн мэдээлэл болон дансны мэдээлэл, нууц үгээ оруулахгүй байхыг анхааруулж байна.