2025 онд дэлхийн тэргүүлэх технологийн компаниуд хиймэл оюун ухааны салбарт ноёрхохын тулд урьд өмнө байгаагүй өндөр хэмжээний хөрөнгө оруулалт хийнэ. Japan Times агентлагийн мэдээлснээр Microsoft, Amazon, Alphabet, Meta зэрэг компаниуд нийт 344 тэрбум ам.долларын хөрөнгө оруулалтыг хиймэл оюун ухааны загваруудыг дэмжих мэдээллийн төвүүдэд чиглүүлэхээр төлөвлөжээ.
Microsoft өнгөрсөн улиралд 24.2 тэрбум ам.доллар зарцуулсан бөгөөд энэ тоог 30 тэрбумд хүргэх зорилготой байна. Үүлэн үйлчилгээний Azure платформын борлуулалт 39 хувиар өссөн нь шинжээчдийн таамгийг давсан үзүүлэлт болсон. Гүйцэтгэх захирал Сатя Наделла “AI дэд бүтцийн давалгааг тэргүүлж байна” хэмээн онцолсон.
Amazon энэ улиралд 31.4 тэрбум доллар зарцуулсан нь өнгөрсөн жилийн мөн үеийнхээс бараг хоёр дахин их дүн юм. Гэвч AWS үүлэн салбарын өсөлт саарсан нь хувьцааны үнэд сөргөөр нөлөөлж, 8.1 хувиар буурахад хүргэсэн. Шинжээчдийн үзэж байгаагаар энэхүү дарамт 2026 он хүртэл үргэлжлэх магадлалтай.
Alphabet компани хөрөнгө оруулалтын төсвөө 10 тэрбум доллароор нэмэгдүүлж, нийт 85 тэрбумд хүргээд байна. Тэд үүлэн үйлчилгээний эрэлт эрчимтэй нэмэгдэж байгаатай холбон тайлбарласан. Гүйцэтгэх захирал Сундар Пичай үүнийг хангахын тулд дэд бүтцээ тэлэх шаардлагатай гэж үзжээ.
Meta компани ч мөн адил зардлын таамаглалаа өсгөж, шинэ дата төвүүдийг барихаас гадна Superintelligence нэртэй шинэ нэгжийг байгуулсан. Тус хэлтэс нь хүний түвшний хиймэл оюун ухаан хөгжүүлэх зорилготой. Энэ стратегийг хөрөнгө оруулагчид эерэгээр хүлээн авч, тайлангийн дараа хувьцааны ханш 8 хувиар өссөн байна.
Apple энэ өрсөлдөөнд бага зэрэг хоцорч яваа. Эхний 9 сарын байдлаар тэдний хөрөнгө оруулалтын зардал 9.47 тэрбум долларт хүрсэн нь өмнөх оноос 45 хувиар өссөн ч бусад өрсөлдөгчидтэй харьцуулахад доогуур үзүүлэлттэй байна. Санхүүгийн захирал Кеван Парех “AI-д их хэмжээний боловч экспоненциал бус” өсөлт хүлээж буйгаа мэдэгдсэн.
Шинжээчдийн дүгнэж буйгаар технологийн аваргууд OpenAI болон бусад хүчтэй өрсөлдөгчдийг гүйцэхийн тулд их хэмжээний хөрөнгө оруулалт хийхээс аргагүй болжээ. Энэ бол зүгээр нэг бизнесийн алхам биш харин ирээдүйн технологийн ноёрхолд хүрэх стратегийн өрсөлдөөн юм.
