2025 оны тавдугаар сарын 12-нд Монголын “The MongolZ” баг Украйны алдарт “NAVI”-г хожиж, “PGL Astana” тэмцээний плей-оффын шатанд шалгарсан билээ. Тоглолтын дараа багийн тоглогч Techno4K сэтгүүлчтэй ярилцжээ.
– Плей-оффт шалгарсанд баяр хүргэе. 3-0 гэсэн үзүүлэлттэйгээр нэг ч хожигдолгүй дараагийн шатанд орж байна. Ийм үр дүнг таамаглаж байсан уу?
– Баярлалаа. NAVI-тай хийсэн сүүлийн тоглолт маш хүнд байсан. Бид сүүлийн гурван сарын хугацаанд тэдэнтэй хоёр удаа тоглосон. Нэг удаа хожиж, нөгөөд нь хожигдсон. NAVI биднийг сайн судалсан байсан. Гэхдээ бид ч бас тактикаа өөрчилж, сайтар бэлдсэн.
– Та бүхэн өмнө нь Лиссабонд NAVI-тай тоглоод ялагдаж байсан. Энэ удаа хариугаа авч чадлаа гэж үзэж байна уу?
– Тийм ээ, тэр тоглолт үнэхээр харамсалтай ялагдал болсон. Ялангуяа Mirage дээр бид тэргүүлж байсан. Хэрвээ тэр тоглолтод хожсон бол шууд плей-оффт гарч ирэх боломжтой байсан.
– Falcons, Vitality, MOUZ зэрэг багууд энэ удаад оролцохгүй байна. Харин та нар дээгүүр нэрлэгдэж байгаа. Энэ талаар ямар бодолтой байна вэ?
– Сүүлийн үед бид оролцсон тэмцээн болгондоо дээгүүр жагсаж байна. Өмнө нь бүр илүү боломж байсан. Гэхдээ бусад багуудаа хэзээ ч дутуу үнэлж болохгүй. Spirit, NAVI, Aurora зэрэг нь үнэхээр чансаатай өрсөлдөгчид.
– Одоогийн байдлаар хамгийн хүчтэй өрсөлдөгч хэн гэж бодож байна вэ?
– Миний бодлоор Spirit. Сүүлд Pro League-д бид тэдэнд хожигдсон байх. Одоо бол дахин таарч, хариугаа авахыг хүсч байна.
– Өнөөдрийн ялалтын дараа та нар цэнгэлдэх хүрээлэнд тоглох боллоо. Казахстан улс Монголтой ойрхон. Энэ нь сэтгэлзүйн хувьд давуу тал болох уу?
– Миний хувьд түүхийн талаар төдийлөн сайн мэдэхгүй ч Казахстан манай улстай олон талаараа адилхан юм шиг санагддаг. Хэл, хоол, хүмүүс нь хүртэл төстэй. Тиймээс цэнгэлдэхэд тоглоход илүү дөхөм байх болов уу гэж бодож байна.
