Цагдаагийн Ерөнхий Газрын Кибер гэмт хэрэгтэй тэмцэх газраас гадаад улсаас “Телеграм” платформоор Монголын иргэдийг залилдаг долоон этгээдийг илрүүлж, баривчилсан тухай мэдээллээ.
2024 оны 7-р сараас хойш “Телеграм” аппликэйшн ашиглан үйлдэгдсэн, эзэн холбогдогч нь тогтоогдоогүй залилах гэмт хэрэг 1,362 бүртгэгдэж, иргэдэд нийт 31.4 тэрбум төгрөгийн хохирол учруулжээ. Иймээс иргэдийг “Телеграм” орчинд үйлдэгдэж буй залилангаас болгоомжлохыг анхааруулж, ямар ч тохиолдолд урьдчилгаа мөнгө шилжүүлэхгүй, интернэт банк, цахим хэтэвчээ бусдад ашиглуулахгүй, хувийн мэдээллээ хуваалцахгүй байхыг санууллаа.
ЦЕГ-ын Урьдчилан сэргийлэх албаны мэргэжилтэн, цагдаагийн дэслэгч С.Мягмарсүрэн энэ талаар дараах мэдээллийг өгчээ: “Телеграм орчинд иргэдийг залилдаг долоон этгээдийг дайчлан баривчилсан. Урьдчилсан байдлаар үндэстэн дамнасан зохион байгуулалттай гэмт бүлэгт элсэж, уг бүлгийн аргачлал заавраар гадаад улсаас манай улсын иргэд рүү энэ төрлийн гэмт хэргийг үйлдэж байгаа Монгол Улсын иргэн О нарын долоон этгээдийг дайчлан баривчилж, есдүгээр сарын 2-ний өдрөөс нэр бүхий таван этгээдэд яллагдагчаар цагдан хорих, таслан сэргийлэх арга хэмжээ авч мөрдөн шалгах ажиллагаа явуулж байна. Шалгалтын явцад нэр бүхий иргэдийн байрлаж байсан орон байранд нэгжлэг хийж, гар утас техник хэрэгсэл, гадаад улсын мөнгөн тэмдэгтийг хураан авч, хэрэгт эд мөрийн баримтаар тооцсон. Тус хэрэгт цагдаагийн байгууллагаас нэг жилийн хугацаанд баримтжуулж, гадаад улсаас энэ төрлийн гэмт хэрэг үйлдэж байгаа дээрх бүлэг этгээдийг олж тогтоон дайчлан баривчилсан. Цаашид үндэстэн дамнасан зохион байгуулалттай гэмт бүлэгт элсэн гадаад улсаас манай улсын иргэд рүү чиглэн гэмт хэрэг үйлдэж байгаа Монгол Улсын нэр бүхий этгээдүүдийг олон улсад эрэн сурвалжилга зарлан, Монгол Улсад албадан ирүүлэхээр мөрдөн шалгах ажиллагааг явуулж байгаа,” гэж хэллээ.
2 сэтгэгдэл
Ийм их мөнгөөр хүмүүсийг хохироосон гэхэд үнэхээр аймшигтай байна
Цагдаагийнхан сайн ажиллажээ, шударга ёс ялсан байна