Cybercab төслийн бэлтгэл эрчимжив
Tesla компани Техас дахь “Gigafactory” үйлдвэртээ Cybercab нэртэй өөрөө жолооддог хоёр хүний суудалтай автомашины төслийг эрчимжүүлж байна. Тус компани энэ төслийн гол инженер, үйлдвэрлэлийн мэргэжилтнүүдийг идэвхтэйгээр элсүүлж байгаа бөгөөд энэхүү загвар нь компанийн анхны кибер такси болох юм.
Гига Техас нь одоогоор Cybercab-ийн үйлдвэрлэл явагдах цорын ганц үйлдвэр бөгөөд уг тээврийн хэрэгсэл нь “Unboxed” буюу хайрцаггүй угсралтын шинэ технологиор хийгдэх анхны Tesla машин болно. Энэ арга нь автомашины угсралтын уламжлалт системийг орвонгоор нь өөрчилж, үйлдвэрлэлийн хугацааг багасгах, үр ашгийг нэмэгдүүлэх, улмаар үнэ хямдруулах зорилготой.
Tesla-ийн шинэ үеийн үйлдвэрлэл
Уламжлалт автомашин угсралтын шугамыг 100 гаруй жилийн өмнө Генри Форд нэвтрүүлсэн бөгөөд тэр цагаас хойш үндсэн зарчим нь өөрчлөгдөөгүй. Харин Tesla-ийн шинэ “Unboxed” процесс нь машины хэсгүүдийг бие даан угсарч, дараа нь эцсийн шатанд холбох замаар бүтээдэгээрээ онцлог юм.
Элон Маск өмнө нь Cybercab-ийг Tesla-ийн хамгийн олон тоогоор үйлдвэрлэх загвар болно гэж мэдэгдсэн. Жилийн зорилтот хэмжээ нь 2 сая ширхэг бөгөөд үйлдвэрлэлийн шугам нь уламжлалт автомашины үйлдвэрээс огт өөр харагдана гэж тэр онцолжээ.
Тэрбээр өмнө нь дараах үгийг хэлсэн байна:
“Хэрэв та Cybercab-ийн үйлдвэрлэлийн шугамыг харвал энэ нь уламжлалт автомашины үйлдвэр биш, харин өндөр хурдны хэрэглээний цахилгаан бараа үйлдвэрлэх үйлдвэр шиг харагдана. Энэ шугам асар хурдан ажиллах тул хүмүүс бараг дэргэд нь очиж чадахгүй. Эцэст нь бид таван секундын дотор машин үйлдвэрлэж чадна гэж бодож байна.”
