The MongolZ-ийн гэнэтийн шийдвэр: Senzu-г сэлгээ рүү шилжүүлэв
The MongolZ баг өөрийн гол тоглогч М.Азбаяр буюу “Senzu”-г нөөцөд шилжүүлэх гэнэтийн шийдвэр гаргаснаа зарлалаа. Одоо 19 настай энэ тамирчныг багаас зайлуулах энэ арга хэмжээг олон хүн гайхан хүлээж авчээ. Ялангуяа Мэйжор тэмцээн эхлэхэд сардохгүй хугацаа үлдээд байхад гүрэлдэхүүндээ ийм том өөрчлөлт оруулах нь онцгой анхаарал татжээ.
The MongolZ-ийн хувьд энэ улирлын хоёрдугаар хагаст цахим спортын дэлхийн аварга шалгаруулах тэмцээнд түрүүлж, “BLAST Bounty” болон “FISSURE Playground 2” арга хэмжээнүүдийн шийдвэрлэх шатанд шалгарсан байдаг. Багийн талээс тайлбар гаргаж, маш сайн хэлэлцүүлэг, ярилцлага явуулсны үр дүнд ийм шийдвэрт хүрсэн гэж мэдэгджээ. “Senzu” 2023 оны есдүгээр сард The MongolZ-ийн бүрэлдэхүүнд нэгдэж, тэр цагаас хойш ганцаарчилсан тоглогчийн үзүүлэлтээрээ багаа тэргүүлж, дэлхийн шилдгүүдийн нэг болсон юм. Тэр өөрийн цахим хуудсаараа дамжуулан багаас явж байгаагаа баталж, харамсалтай мэдээ тараасандаа уучлалт хүссэн байна.
Senzu-г хэн орлох вэ? Болзошгүй тамирчдын жагсаалт
The MongolZ-ийн дараагийн арга хэмжээ болох “IEM Chengdu 2025” ирэх арваннэгдүгээр сарын 3-нд эхлэх тул шинэ гишүүнээ танилцуулах шаардлагатай болжээ. Одоогоор Senzu-ийн орыг залгах болзошгүй гэсэн дараах нэрс яригдаж байна:
- yAmi /Chinggis Warriors/ буюу О.Ялалт – Одоогийн Монголын шилдэг тоглогчдын нэг. The MongolZ-ийн дасгалжуулагч “maaRaa” болон yAmi нар ах дүүсийн сайн харилцаатай. Chinggis Warriors баг Мэйжорт шалгарахгүй байсан тул yAmi-ийг нэгтгэх боломжтой гэсэн шуугиан гарчээ.
- sk0R /The Huns/ буюу Б.Тэнгис – Өмнө нь “bLitz”, “Techno” нартай хамт IHC Esports-ийн бүрэлдэхүүнд Мэйжорын тэмцээнд оролцож байсан. Гэхдээ The Huns баг Мэйжорт шалгарсан тул sk0R-ийн багаа орхих эсэх нь эргэлзээтэй хэвээр байна.
- Kamui /The QUBE/ буюу А.Тамир – Өнгөрсөн есдүгээр сараас хойш The MongolZ-ийн гишүүдтэй хамт бэлтгэл хийж, тоглож эхэлсэн гэсэн мэдээлэл гарчээ. Түүнийг The QUBE багаас өчигдөр элсүүлсэн гэх шуугиан гарсан юм.
Мөн Хойд Америкт од болж буй буриад залуу “nocries”-ийг The MongolZ-д нэгтгэх боломжтой гэж ярьж байгаа ч энэ нь биелэх магадлал багатай, бараг боломжгүй гэж үзэж байна. The MongolZ-ийн академийн тамирчдаас хэн нэгэн үндсэн бүрэлдэхүүнд дуудагдахыг үгүйсгэхгүй байна.
Senzu-ийн дараагийн баг: Гол клубууд сонирхожээ
Дэлхийн шилдэг тоглогчдын нэг болсон “Senzu”-г томоохон багууд сонирхох нь мэдээж. Баг нь гэрээтэй тамирчнаа үнэгүй явуулахгүй бөгөөд түүний төлөө дор хаяж хоёр сая ам.доллар шаардагдах аж. Одоогоор АНУ-ын “FaZe”, “Liquid”, Украины “NaVi”, Саудын Арабын “Falcons” багуудын нэрс яригдаж байна. “FaZe”, “Liquid” нар бүрэлдэхүүнээ өөрчлөн шинэчлэх ажлаа эхлүүлж, тамирчдаа сольж байгаа бол “NaVi”, “Falcons” нар амжилт гаргахад бэлэн ч хүчээ нэмэх шаардлагатай байна. Иймээс эдгээр багуудад Senzu шиг тоглогч хэрэгтэй байгаа нь илт юм.
Удахгүй The MongolZ-ийн шинэ гишүүн, Senzu-ийн дараагийн баг тодорхой болохыг хүлээж байна.
