Цахим спортын Counter-Strike 2 төрлийн хамгийн нэр хүндтэй тэмцээнүүдийн нэг болох PGL Astana 2025 Казахстан улсын Астана хотод амжилттай үргэлжилж байна. Нийт 1.2 сая ам.долларын шагналын сантай тус тэмцээнд Монгол Улсаа төлөөлөн оролцож буй The MongolZ баг өнөөдөр гурав дахь ялалтаа байгуулж, Playoffs шатны шөвгийн наймд шалгарлаа.
Тэмцээний бүтэц нь тойргийн журмаар явагдаж, 16 баг тус бүр таван тоглолт хийх боломжтой. Гурван тоглолтод ялалт байгуулсан багууд хасагдах шат руу шууд шалгарч байна. The MongolZ эхний тоглолтдоо Бразилын FURIA, дараагийн тоглолтдоо мөн Бразилын MIBR багийг хожсоноор хоёр ялалттай болсон билээ.
Хамгийн чухал, шөвгийн наймд шалгарахын төлөөх гурав дахь тоглолт өнөөдөр болж, манай баг өнгөрсөн оны дэлхийн аварга Украины Natus Vincere (NaVi) багийг 2:0 харьцаатайгаар буулган авлаа. Тоглолт “best-of-3” буюу гурван газрын зураг (map) дээр ялагчийг тодруулах форматаар явагдав.
Эхний Inferno map дээр манай баг хамгаалах талаасаа эхэлж, дараа нь довтолгооны үе шатанд маш сайн тоглож, 13:11 онооны харьцаатай ялалт байгуулсан. Манай багийн AWPer (мэргэн буудагч) 910 энэхүү map дээр 17 kill хийж, багаа тэргүүлэв. Хоёр дахь Mirage map дээр NaVi-ийн сонгосон стратегийг тасалж, мөн 13:11-ээр ялалт байгуулснаар The MongolZ гурав дараалан хожиж шөвгийн наймд нэрээ бичүүллээ.
Тэмцээн энэ сарын 18-ныг хүртэл үргэлжлэх бөгөөд түрүүлсэн баг 400,000 ам.доллар, удаах байруудад 187,500, 150,000, 87,500 ам.долларын шагнал хүртэх юм. Шөвгийн наймын хасагдах шатны тоглолтууд 5-р сарын 17-нд “Barys Arena”-д болох бөгөөд The MongolZ-ийн дараагийн өрсөлдөгч хараахан тодроогүй байна.
PGL Astana 2025 тэмцээнийг Францын Team Vitality, Саудын Арабын Team Falcons, Данийн MOUZ багууд өнжиж байгаа бол ОХУ-ын Team Spirit эргэн оролцож байгаа нь онцлогтой.
