Утас цэнэглэх явцад бага зэрэг халалт мэдрэгдэх нь хэвийн зүйл гэж мэргэжилтнүүд үзэж байна. Гэхдээ энэ халаалт нь хэзээ аюулгүй, хэзээ анхаарал шаардсан шинж тэмдэг болохыг ялгаж ойлгох нь чухал юм.
Цахилгаан дамжуулалт явагдах явцад энергийн тодорхой хэсэг дулаан хэлбэрээр алдагдаж байдаг бөгөөд энэ нь ялангуяа хурдан цэнэглэх горим ашиглах үед мэдэгдэхүйц болдог. Хэрэв хэрэглэгч баталгаатай үйлдвэрлэгчийн, чанарын гэрчилгээтэй адаптер болон кабель ашиглаж байгаа бол утас болон цэнэглэгчийн бага зэрэг халах нь хэвийн гэж тооцогдоно.
Харин зарим тохиолдолд цэнэглэгч ердийн дулаанаас илүү халж, хүрэхэд хүндрэлтэй болтлоо халах нь төхөөрөмжид техникийн гэмтэл гарсны илрэл байж болзошгүй юм. Ийм нөхцөлд цэнэглэгчийг шууд ашиглалтаас гаргаж, залгуураас салгах нь аюулгүй байдалд нийцнэ. Хэт халалт нь цахилгаан системд ноцтой гэмтэл үүсгэх, улмаар гал түймэр гаргах, эсвэл химийн хорт бодис агаарт дэгдэх зэрэг эрсдэлийг дагуулдаг тул хэрэглэгч маш болгоомжтой байх шаардлагатай.
Цэнэглэгч хэт халж байгааг анзаарах хамгийн гол шинж бол гадаргуу нь хэт халуун болж, хуруугаар барихад таагүй мэдрэмж төрүүлэх явдал юм. Үүнээс гадна цэнэглэх явцад утаа, шатсан үнэр мэдрэгдвэл энэ нь аюултай нөхцөл байгааг илтгэнэ. Ийм үед утсыг шууд салгаж, хэрэглээг зогсоох, улмаар холбогдох мэргэжлийн байгууллагад хандах хэрэгтэй.
Хэт халалт үүсэхэд хэд хэдэн хүчин зүйл нөлөөлдөг. Үүнд үйлдвэрлэгчийн бус хямд адаптер, дотоод гэмтэлтэй кабель, эсвэл хүчтэй нарны гэрэлд удаан байрлуулсан зэрэг шалтгаанууд хамаардаг. Тиймээс хэрэв хэрэглэгч төхөөрөмжийн хэвийн бус халаалтыг мэдэрвэл шууд арга хэмжээ авах нь өөрийгөө болон бусдыг хамгаалах хамгийн чухал алхам юм.
