НҮБ-ын хориг арга хэмжээнүүдийн хэрэгжилтийг хянадаг олон улсын багийн шинэ тайлангаас үзэхэд, Умард Солонгос улс 2024 оноос 2025 оны есдүгээр сарын хооронд нийт 2.8 тэрбум ам.долларын криптовалют хулгайлсан нь тогтоогджээ.
Кибер халдлагын хэмжээ тэлж байна
Япон, АНУ, Өмнөд Солонгос зэрэг 11 улсын төлөөлөгчдөөс бүрдсэн Олон талт хориг арга хэмжээний хяналтын баг (MSMT)-ийн тайланд дурдсанаар, Умард Солонгосын хакерууд дэлхийн томоохон криптовалютын биржүүдэд халдлага үйлджээ. Тухайлбал, АНЭУ-ын “Bybit”, Японы “DMM Bitcoin” зэрэг платформууд халдлагын гол бай болсон байна.
Тус багийн мэдээлснээр, эдгээр халдлагууд Умард Солонгосын цөмийн хөтөлбөр болон зэвсгийн үйлдвэрлэлийг санхүүжүүлэх зорилготой байж болзошгүй гэж дүгнэжээ.
Технологийн хулгай ба тагнуулын ажиллагаа
Тайланд мөн дурдсанаар, Умард Солонгосын кибер гэмт этгээдүүд АНУ, Их Британи, Өмнөд Солонгос болон бусад орноос цөмийн байгууламж, шумбагч онгоцны технологийн мэдээлэл хулгайлахыг оролдсон байна.
Өмнөд Солонгосоос хулгайлсан технологийг тус улс тагнуулын хиймэл дагуул болон шумбагч онгоцноос харвадаг баллистик пуужин хөгжүүлэхэд ашиглаж байгаа тухай MSMT онцолжээ.
НҮБ-ын шинэ хяналтын багийн үүрэг
2024 оны дөрөвдүгээр сард НҮБ-ын Аюулгүйн Зөвлөлийн Шинжээчдийн зөвлөлийг ОХУ-ын хоригийн улмаас татан буулгасны дараа, тухайн оны 10-р сард MSMT багийг шинээр байгуулсан байна. Тус баг нь Умард Солонгосын эсрэг хэрэгжүүлж буй хориг арга хэмжээний биелэлтийг хянах чиг үүрэгтэй юм.
MSMT-гийн энэ долоо хоногийн хамтарсан мэдэгдэлд:
“НҮБ-ын Аюулгүйн Зөвлөлийн холбогдох тогтоолуудыг зөрчиж, үүргээ биелүүлэхээс татгалзаж буй Умард Солонгосын үйлдлийг харгалзан, Шинжээчдийн зөвлөлийг өмнөх бүтэц бүрэлдэхүүнээр нь дахин байгуулахыг бид уриалж байна”
хэмээн дурджээ.
Олон улсын хамтын нийгэмлэгийн анхааралд
Шинжээчдийн үзэж буйгаар Умард Солонгосын кибер халдлагууд дэлхийн санхүүгийн аюулгүй байдалд бодит эрсдэл үүсгэж байгаа бөгөөд криптовалютын зах зээлийн хяналт, хамгаалалтын системийг сайжруулах шаардлага улам нэмэгдэж байна.
