Британийн инженерийн RML Group компани цахилгаан гиперкаруудад зориулсан дэлхийн хамгийн өндөр хүч чадалтай батарей болох VarEVolt-ийг албан ёсоор танилцууллаа. Энэхүү шинэ технологи нь ердөө 18 секундын дотор 100% цэнэглэгдэх хосгүй чадвараараа автомашины салбарт томоохон дэвшлийг авчирч байна.
VarEVolt батарей нь нэг килограмм тутамд 6 кВт эрчим хүч гаргах хүчин чадалтай бөгөөд шаардлагатай үед бүх эрчим хүчээ агшин зуур суллах боломжтой. Энэ үзүүлэлт нь богино хугацаанд өндөр ачаалал шаарддаг спорт загварын машинуудад онцгой тохиромжтой юм. Жишээ нь, Czinger C21 загварын гиперкар дээр хийсэн туршилтаар 40 секундын дотор 4.5 кВт.ц эрчим хүч ялгаруулсан нь батлагджээ.
Энэхүү батарей нь 200C хэмээх цэнэглэлийн хурдаар ажилладаг. Өөрөөр хэлбэл, 18 секундын дотор бүрэн цэнэглэгдэх боломжтой гэсэн үг. Харьцуулбал, Porsche Taycan загварын 5C батарей нь бүрэн цэнэглэхэд 12 минут шаарддаг.
RML Group VarEVolt батарейг анх өндөр шаардлагад нийцэх нийлүүлэгч олдохгүй байсантай холбоотойгоор өөрсдөө хөгжүүлж эхэлсэн бөгөөд өдгөө тус батарей нь Conformity of Production (CoP) буюу олон улсын үйлдвэрлэлийн стандартыг хангаж, олон улсын зах зээлд гаргахад бэлэн болсон байна.
VarEVolt нь модульчлагдсан бүтэцтэй бөгөөд хүчин чадал, багтаамжийн шаардлагад нийцүүлэн янз бүрийн загварт тохируулан суурилуулах боломжтой. Цаашид тус компани хуучин гиперкар үйлдвэрлэгч нартай хамтран ажиллаж, шинэ үеийн батарейн технологийг хөгжүүлэх, модернизацийн иж бүрдэл санал болгохоор зорьж байна.
RML Group дотоод шаталтын хөдөлгүүр дээр олон жил ажилласан туршлагаараа энэхүү өндөр хүчин чадалтай, супер хурдтай цэнэглэгддэг цахилгаан батарейг бүтээж, цахим автомашины ирээдүйн хөгжлийг шинэ түвшинд хүргэж байна.
