Хэрвээ та өдөрт хэдэн цагийг видео тоглоомд зарцуулдаг бол үүндээ гэмшилгүй байж болно. Учир нь шинжлэх ухааны судалгаагаар тоглоом тоглох нь стресс бууруулахад үр дүнтэй нөлөөтэй болох нь батлагджээ — тэр тусмаа хүчирхийлэлтэй агуулгатай тоглоомууд ч тайвшруулах үйлчилгээ үзүүлж байна.
Туршилтаар батлагдсан үр дүн
Судлаач Гари Вагенер-ийн ахалсан судалгааны баг 18–40 насны 82 оролцогчийг хамруулсан бөгөөд тэднийг “A Plague Tale: Requiem” тоглоомын тусламжтайгаар туршжээ. Судалгааны үе шат дараах байдлаар явагдсан:
SECPT стресс тест: Оролцогч бүр гараа 3 минутын турш хүйтэн усанд (~4°C) дүрж, стресс үүсгэсэн
Дараа нь тэдгээрийг хоёр бүлэгт хуваан:
Нэг хэсэг нь тоглоомын хүчирхийлэлтэй хэсэг
Нөгөө хэсэг нь тайван, намуухан үзэгдлүүдийг тоглосон
Хэмжилт, үр дүн:
Физиологийн шинжилгээ:
ЭКГ (зүрхний хэмнэл)
Кортизол (стресс даавар)-ын шүлсний түвшин
Сэтгэлзүйн үнэлгээ:
Оролцогчдын сэтгэл хөдлөлийн үнэлгээ, асуулгын хариулт
25 минутын дараа аль аль бүлгийн оролцогчдын физиологийн стрессийн түвшин тодорхой хэмжээгээр буурсан нь тогтоогджээ.
“Хүмүүс өөрсдийгөө стрессдэж байна гэж боддог ч бие махбод нь тайвширч эхэлсэн байдаг. Энэ нь дотоод мэдрэмж болон биеийн бодит хариу үйлдлийн хооронд зөрүү байгааг харуулж байна” гэж судлаачид тайлбарлажээ.
Яагаад тоглоом тоглоход стресс буурдаг вэ?
Судалгаанд оролцсон болон бусад тоглогчдын нийтлэг хандлагаас харахад дараах хүчин зүйлс стресс буурахад нөлөөлдөг байна:
Хяналтыг өөртөө мэдрэх
Амжилтад хүрэх сэтгэл ханамж
Бодит амьдралаас түр ч атугай ангижрах
Эдгээр нь сэтгэл зүйн хувьд тайвшруулах, сэргэлт өгөх нөлөө үзүүлдэг.
Харин сөрөг нөлөө ч бас оршдог
Судлаачид анхааруулж буй нэг чухал зүйл бол — хэт их тоглох, нойр дутуу явах, эсвэл онлайнаар сөрөг орчинд орох нь стрессийг бууруулах биш харин улам нэмэгдүүлэх магадлалтай юм.
PvP (тоглогчийн эсрэг тоглогч) горимтой, хурдан хэмнэлтэй тоглоомууд ч мөн адил стресс үүсгэгч болж болохыг судалгаа харуулжээ.
Дүгнэлт
“A Plague Tale: Requiem” шиг хурц, сэтгэл хөдлөлтэй тоглоомууд ч хүний стрессийг бууруулах чадвартайг энэ судалгаа нотоллоо. Гэсэн хэдий ч уг үр дүнг бүх төрлийн тоглоомд шууд хамааруулах боломжгүй бөгөөд тоглоом сонгохдоо ухаалаг, эрүүл мэндэд нийцтэй байдлаар хандах нь хамгийн чухал гэж судлаачид зөвлөж байна.
