iPhone хэрэглэгчдийн хувьд WhatsApp-ыг ашиглах туршлагыг илүү ухаалаг, хялбар болгох шинэ функц тун удахгүй танилцуулагдаж магадгүй байна. Бета хувилбарын хүрээнд мессежийн хэлхээний функц туршилтаар нэвтэрч эхэлжээ.
Энэ шинэ боломж нь Android хэрэглэгчдийн хувьд өмнө туршигдсан “discussions” функцийн аналог бөгөөд бүлгийн чатаас тодорхой зурвасуудыг тусад нь хэлэлцэх нөхцөлийг бүрдүүлдэг. Ингэснээр үндсэн чат эмх замбараагүй болохоос сэргийлж, нэг мессежийн хүрээнд үүссэн бүх хариулт, маргааныг нэг дэлгэцнээс харах боломжтой болж байна.
Шинэ функц хэрхэн ажиллах вэ?
- Групп чат дотор тодорхой зурвас руу хариу бичигдэхэд тухайн зурвас дээр тоолуур гарч ирнэ.
- Үүнийг товшсоноор шинэ цонх нээгдэж, тухайн мессежтэй холбоотой бүх хариулт, хэлэлцүүлэг дарааллаар харагдана.
- Хэрэглэгч энэ цонхноос шууд үргэлжлүүлэн хариулж, хэлэлцүүлгийг салангид байдлаар удирдах боломжтой.
Энэ нь идэвхтэй бүлгийн чатууд дахь олон сэдвийн зэрэг яриаг илүү хялбар хянахад туслах бөгөөд өмнөх ишлэл бүхий хариултын системээс илүү үр дүнтэй гэж тооцогдож байна.
Одоогоор уг функцийг Apple-ийн TestFlight платформоор дамжуулан зөвхөн цөөн тооны хэрэглэгч ашиглаж байгаа бөгөөд WhatsApp шинэ боломжуудаа үе шаттайгаар нийтэд нэвтрүүлдэг тул олон нийтэд хүрэх хүртэл хэд хэдэн хувилбар гарч болзошгүй.
