Үзэгчдийн тоо огцом багасав
2025 оны есдүгээр сард олон сая дагагчтай алдартай YouTube сувгуудын үзэлт мэдэгдэхүйц буурсан нь контент бүтээгчдийг төдийгүй үзэгчдийг ч гайхшрууллаа. Сувгийн эзэмшигч Жош Стриф Хейсийн мэдээлснээр зурагт, ухаалаг утас болон таблет дээр үзэгчдийн тоо хэвийн байсан ч персонал компьютерээр үзэгчдийн тоо огцом буурсан нь хамгийн их нөлөөлсөн үзүүлэлт болжээ. Үүнтэй төстэй хандлагыг Линус Себастианы эзэмшлийн TechLinked суваг баталсан байна.
YouTube-ийн албан ёсны тайлбар
YouTube-ийн төлөөлөгчид үзэлт буурсныг зар хориглогч болон браузерийн өргөтгөлүүдтэй холбон тайлбарлаж, эдгээр хэрэгслүүдийн идэвхтэй хэрэглээ нь статистикийн нарийвчлалд шууд нөлөөлж болохыг хүлээн зөвшөөрсөн. Тухайлбал, зар хориглогчийг шинэчлэх үед үзэгчдийн урсгалд хүчтэй хэлбэлзэл үүсдэг аж.
Сонирхолтой зөрчил
Линус Себастьян нөхцөл байдлын нэг онцлогийг дурдсан нь анхаарал татлаа. Түүний хэлснээр үзэлт буурсан ч тэдний сувгуудын сурталчилгааны орлого өөрчлөгдөөгүй байна. Энэ нь тоон үзүүлэлтийн алдагдалтай холбоотой байж болзошгүй гэсэн таамгийг улам баталжээ.
YouTube-ийн өөр тайлбарууд
YouTube мөн үзэлт бууралтыг зөвхөн зар хориглогчидтой холбохоос гадна улирлын онцлог болон өмнөх саруудад огцом өсөлт гарсаны дараах тогтворжилт ч байж болзошгүйг дурдсан. Гэсэн хэдий ч Google-ийн зүгээс зар хориглогч ашиглахын эсрэг илүү хатуу арга хэмжээ авч эхэлсэн нь энэ асуудлын гол шалтгаан болж байгаа хэмээн шинжээчид дүгнэж байна.
