Rockstar Games компани олон жил хүлээлгэсэн Grand Theft Auto VI (GTA 6) тоглоомынхоо шинэ гаргах огноог зарлалаа. Тус студийн мэдээлснээр тоглоом 2026 оны арваннэгдүгээр сарын 19-ний Пүрэв гарагт худалдаанд гарна.
Rockstar-ийн мэдэгдэл
Rockstar X платформ дээрх мэдэгдэлдээ:
“Grand Theft Auto VI тоглоом 2026 оны 11-р сарын 19-ний Пүрэв гарагт гарна. Бид хугацаа сунгасандаа уучлал хүсэж байна, гэхдээ энэ нэмэлт сарууд бидэнд тоглоомыг та бүхний хүлээлтэд нийцсэн, төгс түвшинд хүргэх боломжийг олгоно” хэмээн онцолжээ.
Мөн тэд фенүүдийн тэвчээрт талархал илэрхийлж, “тоглогчид Леонидасын өргөн уудам ертөнцийг судалж, орчин үеийн Vice City-д эргэн ирэх боломжтой болсонд баяртай байна” гэж мэдэгджээ.
Хоёр дахь удаагаа хойшиллоо
GTA 6-ийн хөгжүүлэлт дахин сааталтай тулгарсан байна. Тоглоом анх 2025 оны намар гарахаар төлөвлөгдсөн байсан ч дараа нь 2026 оны тавдугаар сарын 26 хүртэл хойшлогдож байжээ. Харин одоо дахин зургаан сараар сунгагдаж, 2026 оны арваннэгдүгээр сар боллоо.
Rockstar техникийн нарийн шалтгааныг дэлгэрэнгүй тайлбарлаагүй ч “дэлхийн хэмжээний чанарыг хангахын тулд илүү цаг шаардлагатай” гэж тодруулсан байна.
Фенүүдийн хариу үйлдэл
Онлайнаар гарсан хариу үйлдэл холимог байлаа. Зарим тоглогчид удаан хүлээлтэд бухимдаж, “2026 он хэтэрхий хол байна” хэмээн шүүмжилсэн бол нөгөө хэсэг нь чанарт анхаарсан шийдвэрийг дэмжиж, “илүү төгс, тогтвортой тоглоом гаргах нь зөв алхам” гэж үзэж байна.
Түүнчлэн олон хэрэглэгч “тоглоом гарах үед шинэ консол эсвэл илүү хүчтэй компьютер худалдан авах хэрэгтэй болох байх” хэмээн хошигножээ.
GTA 6 — хамгийн хүлээлттэй тоглоом
GTA 6 нь Rockstar Games-ийн хамгийн том төсөл бөгөөд Vice City-г орчин үеийн хувилбараар дахин амилуулах, илүү өргөн газрын зураг, бодит мэт физик систем, AI-тай оршин суугчид гэх мэт олон шинэчлэлтэй гарах гэж байна.
Хөгжүүлэгчид тоглоомыг PlayStation 5, Xbox Series X/S, цаашлаад PC хувилбар гаргахыг төлөвлөж байгаа ч сүүлчийн хувилбар нь илүү хожуу гарах магадлалтай гэж эх сурвалжууд мэдээлжээ.
