“Tesla” компанийн хувьцаа эзэмшигчид гүйцэтгэх захирал Элон Маск-ийн бараг 1 их наяд ам.долларын нөхцөлт цалин, урамшууллын төлөвлөгөөг баталлаа. Тус санал нь компанийн жилийн хурлын үеэр санал хураалтад орж, нийт санал өгөгчдийн 75 хувь нь дэмжжээ.
Нөхцөлт төлөвлөгөөний гол агуулга
Шинэ төлөвлөгөөний дагуу Элон Маск дараагийн 10 жилийн хугацаанд 12 шатлалт хувьцааны урамшуулал авах бөгөөд үүний дүнд компанид эзэмших түүний хувь 13%-иас 25% хүртэл өсөх юм. Энэ нь нэмэлт 423 сая хувьцаа гэсэн үг боловч Маскийн хувьд эдгээрийг үнэгүй авахгүй — төлөвлөгөө нь тодорхой зорилтот шалгуурыг биелүүлэхтэй уялдана.
Теслагийн өмнө тавигдсан гол зорилтууд
- Компанийн зах зээлийн үнэлгээг 8.5 их наяд ам.долларт хүргэх,
- Жилийн орлогыг 400 тэрбум ам.долларт хүргэх,
- 20 сая цахилгаан автомашин нийлүүлэх,
- 10 сая бүрэн автомат жолоодлогын идэвхтэй захиалга,
- 1 сая Optimus робот үйлдвэрлэх,
- 1 сая робот-такси арилжааны үйл ажиллагаанд нэвтрүүлэх.
Мөн төлөвлөгөөнд “хамгаалагдсан нөхцөлүүд” буюу байгалийн гамшиг, дайн, цар тахал, хууль тогтоомжийн өөрчлөлт зэрэг тодорхой нөхцөл байдалд компанийн зорилтод хүрэх боломжгүй болсон ч Маск тодорхой хэмжээний хувьцаа авах боломжтой байх заалтууд оржээ.
Эсэргүүцэл ба шүүхийн маргаан
Теслагийн захирлуудын зөвлөл энэхүү төлөвлөгөөг дэмжсэн ч, Гласс Льюис болон ISS зэрэг итгэмжлэгдсэн хөрөнгө оруулагчдын зөвлөх байгууллагууд үүнийг эсэргүүцсэн санал өгчээ. Тэд урамшууллын хэмжээ “хэт өндөр” бөгөөд компанийн ашиг орлогод бодит нэмэр оруулах баталгаа сул гэж үзсэн байна.
Энэхүү санал хураалт нь 2018 онд батлагдсан өмнөх урамшууллын хөтөлбөрийг Делавэрийн Канцлерийн шүүх хүчингүй болгосны дараа дахин боловсруулагдсан хувилбар юм. Маск уг шийдвэрийг давж заалдсан бөгөөд шүүхийн шийдвэр одоогоор гараагүй байна.
Шинэ төлөвлөгөөнд Маскийн улс төрийн идэвхтэй оролцоонд хязгаар тавиагүй бөгөөд Теслад ажиллах хамгийн бага хугацааны шаардлага ч тусгагдаагүй байна.
