Криптовалютын тэргүүлэгчийн үнэ шинэ сарын эхэнд дахин доошиллоо
Дэлхийн хамгийн том криптовалютын нэг болох биткойн арваннэгдүгээр сард тогтмол уруудах хандлагатай байсан бол арванхоёрдугаар сар ч мөн уналтаар эхэллээ. Тодруулбал, даваа гарагт биткойны ханш нэг өдрийн дотор 8 хувиар суларч, 83,879 ам.долларт хүрсэн байна. Үүнээс хойш бага зэрэг сэргэснээр одоогийн байдлаар нэг биткойн 86,465 ам.доллараар арилжаалагдаж байна.
2021 оноос хойших хамгийн хүчтэй сарын уналт
Арваннэгдүгээр сарын турш биткойны ханш нийтдээ 18 мянган ам.доллараар буурсан нь 2021 оны зунаас хойш ажиглагдаагүй хэмжээний огцом сарын уналт болж тэмдэглэгдэв. Ханшийн энэ огцом сулрал нь криптовалют эзэмшигчдээс гадна корпорациудын шийдвэрт нөлөөлж эхэлжээ.
Биткойн хамгийн их хэмжээгээр эзэмшдэг компаниудын нэг болох “Stradegy” даваа гарагт 2025 оны орлогын таамаглалаа доош нь шинэчилсэн байна. Үүний дараа тус компанийн хувьцааны үнэ бирж дээр 3.3 хувиар буурч, хөрөнгө оруулагчдын болгоомжилсон хандлага улам нэмэгдэж буйг харууллаа.
Зах зээлд үл итгэх байдал нэмэгдэж, өсөлтийн төлөвт эргэлзээ төрж байна
Вашингтонд төвтэй “Monex USA” фирмийн арилжааны захирал Хуан Перез нөхцөл байдлыг тайлбарлахдаа:
“Крипто болон технологийн салбар дахь сонирхол буурч байгаа тул биткойны ханш унаж байна. Одоогийн байдлаар энэхүү сөрөг хандлага нь зах зээл дахь компаниудын төвлөрөл нэмэгдэж, тухайн салбарын өсөлт тогтвортой явагдах эсэхэд эргэлзээ төрсөнтэй холбоотой” гэж хэлжээ.
Ингэснээр биткойн болон криптовалютын эргэн тойрон дахь эрсдэл, болгоомжлол дахин идэвхжиж, хөрөнгө оруулагчид дунд хугацааны төлөвийг дахин үнэлэх шаардлагатай нөхцөл байдал үүсч байна.
