Apple-ийн дараагийн үйлдлийн систем болох iOS 27-ийг ямар iPhone загварууд дэмжихгүй байж магадгүй талаарх мэдээлэл ил болж, хэрэглэгчдийн анхаарлыг татаж байна. Хятадын нэгэн инсайдер iOS 27 суух боломжтой төхөөрөмжүүдийн жагсаалтыг нийтэлсэн бөгөөд энэ мэдээлэл үнэн бол дор хаяж дөрвөн iPhone шинэчлэлтээс хасагдах төлөвтэй байна. Мөн шинэ системийн хамгийн доод шаардлага нь A14 чиптэй төхөөрөмж байх магадлалтай байгаа юм. Ингэснээр шинэ хувилбар хэзээ гарах, ямар өөрчлөлт авчрах, энэ мэдээлэл хэр бодитой вэ гэсэн асуулт гарч ирж байна.
Weibo дээр мэдээлэл түгээсэн блогерын бичсэнээр iOS 27 нь iPhone 11, iPhone 11 Pro, iPhone 11 Pro Max болон iPhone SE-ийн хоёрдугаар үеийн загваруудыг дэмжихгүй аж. Эдгээр бүх төхөөрөмж A13 Bionic процессортой бөгөөд 2019-2020 онд танилцуулагдаж байсан загварууд юм.
Үүнтэй ижил мэдээллийг 9to5Mac мөн дурдсан бөгөөд задруулсан жагсаалтад нийцтэй төхөөрөмжүүдийн бүрэн нэрс багтсан ч дээрх дөрвөн загвар байхгүй байгааг онцолсон байна. Хэрэв энэ мэдээлэл батлагдвал Apple хуучин iPhone-уудын дэмжлэгийг дараалан хоёр жил хасаж буй хэрэг болох юм. Үүнээс өмнө iPhone XS цуврал шинэчлэлтийн жагсаалтаас гарч байсан билээ.
Одоогоор гарч буй мэдээллээр iOS 27-ийг дэмжих хамгийн хуучин төхөөрөмж нь A14 Bionic чиптэй iPhone 12 байх төлөвтэй байна. 2020 оны аравдугаар сард танилцуулсан iPhone 12 цуврал нь 5G дэмжлэг, бүх хувилбартаа OLED дэлгэц, мөн хавтгай ирмэгтэй шинэ загварыг авчирснаараа онцлог байв.
A13 болон A14 чипийн ялгаа нэлээд мэдэгдэхүйц гэж үзэж байна. A14 нь 7-нм биш 5-нм техпроцессоор бүтээгдсэн бөгөөд нейрон хөдөлгүүр нь 8 биш 16 цөмтэй болсон. Ийм техникийн ахиц нь iOS 27-ийн нийцлийн доод босгыг тодорхойлж байгаа гол шалтгаан байх магадлалтай гэж ажиглагчид үзэж байна.
Гэхдээ шинэчлэлт авна гэдэг нь бүх боломжийг бүрэн ашиглана гэсэн үг биш юм. Apple Intelligence функцууд өмнөхийн адил зөвхөн iPhone 15 Pro болон түүнээс шинэ төхөөрөмжүүд дээр ажиллах төлөвтэй байна. Өөрөөр хэлбэл, iPhone 12 болон iPhone 13 загварууд iOS 27 шинэчлэлтийг авах боломжтой ч өргөтгөсөн хиймэл оюуны боломжуудыг ашиглахгүй байж мэднэ.
Одоогийн байдлаар задраад буй мэдээллүүдээс харахад iOS 27 нь томоохон шинэчлэлээс илүү тогтвортой ажиллагаанд анхаарсан хувилбар байх шинжтэй байна. Гэсэн ч хэд хэдэн өөрчлөлт аль хэдийн яригдаж эхэлжээ. Тухайлбал, үндсэн дэлгэц дээр иконкны байрлалыг өөрчлөх үед цуцлах, сэргээх хурдан товч нэмэгдэх, Liquid Glass эффектийн тунгалагшлын түвшинг өөрчлөх тохиргоо гарч ирэх, Siri-ийн интерфейс шинэчлэгдэж Dynamic Island-тай илүү нягт уялдах, мөн Visual Intelligence хэсэгт бүтээгдэхүүний шошго унших, холбоо барих мэдээлэл таних боломжууд нэмэгдэх тухай ярьж байна. Үүнээс гадна Wallet болон Safari аппликэйшнүүдэд ч тодорхой сайжруулалт хийх төлөвтэй байгаа аж.
Bloomberg-ийн Марк Гурманы мэдээлснээр Apple хиймэл оюуны боломжуудаа мэдэгдэхүйц өргөжүүлэхээр зорьж байгаа бөгөөд Apple Intelligence-ийн талаар өмнө өгч байсан амлалтуудаа энэ шинэчлэлтээр дамжуулан хэрэгжүүлэхээр төлөвлөж байна.
iOS 27-ийн албан ёсны танилцуулгыг 2026 оны зургаадугаар сарын 8-12-ны хооронд болох WWDC 2026 хөгжүүлэгчдийн чуулганы үеэр хийхээр хүлээж байна. Ихэвчлэн анхны developer beta хувилбар танилцуулгын дараа шууд гардаг бол эцсийн хувилбар нь шинэ iPhone-уудын хамт есдүгээр сард хэрэглэгчдэд хүрдэг уламжлалтай.
Гэсэн ч албан ёсны танилцуулга болохоос өмнө энэ бүх мэдээлэл зөвхөн задруулсан эх сурвалж дээр үндэслэж байгааг санах хэрэгтэй. iOS 27-ийг яг ямар төхөөрөмжүүд албан ёсоор дэмжих нь Apple-ийн танилцуулгын дараа л бүрэн тодорхой болох юм.
