2025 оны наймдугаар сарын 14-нд биткойны ханш Ази дахь арилжааны эхэнд 0.9%-иар өсөж, 124,002.49 ам.долларт хүрснээр шинэ дээд амжилт тогтоолоо. Энэ нь 2024 оны долдугаар сард бүртгэгдсэн өмнөх оргил үзүүлэлтээс давсан бөгөөд Холбооны нөөцийн систем мөнгөний бодлогоо зөөлрүүлэх, институцийн худалдан авалт нэмэгдэх, Трампын засаг захиргааны крипто зах зээлийг дэмжих алхмууд зэрэг хүчин зүйлс нөлөөлжээ.
Тус өдөр Ether токен мөн 4,780.04 ам.долларт хүрч, 2021 оны сүүлээс хойших хамгийн өндөр түвшинд хүрсэн байна.
IG зах зээлийн шинжээч Тони Сайкамор:
“125,000 ам.доллараас дээш тогтвортой өсөлт нь биткойны ханшийг 150,000 ам.доллар руу түлхэж мэднэ” гэж мэдэгдэв.
Трампын бодлого ба крипто зах зээл
2025 оны эхэнд Дональд Трамп Цагаан ордонд эргэн ирснээс хойш биткойны ханш бараг 32%-иар өссөн. Түүнийг “крипто-ерөнхийлөгч” гэж нэрлэх болсон бөгөөд түүний гэр бүл ч мөн крипто салбарт нэвтрэх сонирхолтой байгаагаа илэрхийлжээ.
CoinMarketCap-ийн тооцоогоор криптовалютын зах зээлийн нийт үнэлгээ 2024 оны арваннэгдүгээр сард 2.5 их наяд ам.доллар байсан бол өнөөдөр 4.18 их наяд ам.долларт хүрсэн байна.
Өнгөрсөн долоо хоногт гарсан гүйцэтгэх тушаалаар тэтгэврийн данснуудад криптовалютын хөрөнгийн ангиллыг илүү хүртээмжтэй болгох боломж бүрдэж, BlackRock, Fidelity зэрэг хөрөнгийн менежментийн компаниудад шинэ боломж нээгдэв.
Эрсдэл
Гэсэн ч Ройтерсийн мэдээлснээр, тэтгэврийн хөрөнгө оруулалтын салбарт криптовалютын оролцоо нь өндөр хэлбэлзэлтэй шинж чанараасаа болж илүү эрсдэл дагуулж болзошгүй.
2024 оны арванхоёрдугаар сарын үзүүлэлттэй харьцуулахад, долдугаар сарын дунд үеэс хойш биткойны ханш 30%-иар өсөж, анх удаа 120 мянган ам.долларын босгыг давсан юм.
