OpenAI үндсэн чиглэлээс гадуурх төслүүдээ хумих талаар өмнө нь ярьж байсан ч энэ удаа медиа салбарт томоохон хөрөнгө оруулалт хийж, олныг гайхшрууллаа. Тус компани Technology Business Programming Network буюу TBPN нэртэй технологийн подкастыг 100 сая ам.доллараас давсан үнийн дүнтэйгээр худалдан авсан байна.
Энэ алхам нь олон хүний хувьд санаанд оромгүй шийдвэр болжээ. Учир нь OpenAI сүүлийн жилүүдэд голчлон өөрийн хиймэл оюуны технологийг хөгжүүлэхэд төвлөрч ирсэн юм.
TBPN нь Цахиурын хөндийд нэлээд танигдсан технологийн ток шоу бөгөөд тэнд технологи, хиймэл оюуны хөгжлийн талаар өргөн хүрээтэй ярилцдаг. Нэвтрүүлгийг Жорди Хейс болон Жон Куган нар хөтөлдөг бөгөөд өмнө нь Марк Цукерберг, Сэм Алтман зэрэг нэр хүндтэй бизнес эрхлэгчид зочноор оролцож байжээ.
Төслийн ард ердөө 11 хүний бүрэлдэхүүнтэй жижиг баг ажилладаг ч өдөр тутмын үзэгчдийн тоо нь ойролцоогоор 70 мянгад хүрдэг байна.
OpenAI энэ худалдан авалтаа тайлбарлахдаа TBPN-ийг хиймэл оюуны нөлөө, хөгжил, өөрчлөлтийн талаар нээлттэй ярилцдаг чухал талбар гэж үзэж байгаагаа онцолжээ. Компанийн удирдлагын хувьд технологийн өөрчлөлтийн тухай илэн далангүй, шууд хэлэлцдэг энэ формат таалагддаг аж.
Үүний зэрэгцээ OpenAI энэ хэлцэл инженерүүд болон судлаачдын үндсэн ажилд саад болохгүй гэж мэдэгдсэн байна. Учир нь уг төсөл харьцангуй цөөн нөөц шаарддаг гэж үзэж байгаа юм.
Хэлцэл хийгдсэний дараа ч TBPN өмнөхийн адил Лос-Анжелест үйл ажиллагаагаа үргэлжлүүлж, редакцын хувьд бие даасан байдлаа хадгална гэж мэдээлжээ. Өөрөөр хэлбэл баг нь зочдоо өөрсдөө сонгож, дугаарынхаа хэлбэрийг мөн бие даан шийдэх аж.
Урьдчилсан тооцоогоор TBPN энэ жил голчлон сурталчилгааны орлогоос 30 сая ам.доллар хүртэл ашиг олох боломжтой гэж үзэж байна. Сонирхолтой нь тус төслийн сурталчлагчдын дунд OpenAI-ийн өрсөлдөгчид хүртэл багтаж байгаа аж.
