PlayStation 5-ын үнэ дахин өссөнтэй зэрэгцэн дараагийн үеийн тоглоомын консолуудын өртөг хэр өндөр байх талаар шинжээчид илүү идэвхтэй ярьж эхэллээ. NotebookCheck-ийн мэдээлснээр, Sony болон Microsoft-ийн ирээдүйн шинэ төхөөрөмжүүдийн үнэ ойролцоогоор 1000 ам.долларт хүрч болзошгүй байна.
Энэ таамаглал нь PlayStation 6 болон одоогоор Project Helix гэсэн код нэртэй яригдаж буй шинэ Xbox-той холбоотой. Үнийн өсөлтийн гол шалтгаанаар санах ойн хомсдолыг нэрлэж байгаа бөгөөд энэ нөхцөл байдал дор хаяж 2028 он хүртэл үргэлжилж магадгүй гэж үзэж байна. Ийм хүндрэл нь зөвхөн өртөгт нөлөөлөхгүй, шинэ консолуудын нээлтийн хугацааг ч хойшлуулах эрсдэлтэй.
Өмнө нь PlayStation 6 хамгийн наад зах нь 2029 оноос өмнө зах зээлд гарахгүй байж магадгүй гэх мэдээлэл гарч байсан. Энэ хооронд үйлдвэрлэгчид PlayStation 5-ын одоогийн хэрэглэгчдийн баазаас орлогоо нэмэгдүүлэхэд түлхүү анхаарах төлөвтэй байна.
Kantan Games-ийн зөвлөх Серкан Тото PlayStation 6-ын дор хаяж нэг хувилбарын үнэ 999 ам.доллар байх магадлал бүрэн бодитой гэж үзэж байгаагаа илэрхийлжээ. Үүнтэй төстэй байр суурийг судлаач Йост ван Дройнен ч хэлсэн бөгөөд түүний үзэж байгаагаар 1000 орчим ам.долларын үнэтэй консолууд ирээдүйд шинэ жишиг болж мэднэ.
Ийм өөрчлөлт зөвхөн санах ойн хомсдолоос шалтгаалаагүй. Хиймэл оюуны салбарын огцом өсөлтөөс үүдэн үйлдвэрлэлийн хүчин чадалд ирж буй ачаалал нэмэгдэж, эд ангийн үнэ нийтээрээ өсөж байгаа нь мөн гол нөлөө үзүүлж байна. Үүний улмаас тоглоомын консолуудын үнэ аажмаар өндөр хүчин чадлын гейминг компьютеруудын түвшинд дөхөж болзошгүй болжээ.
Гэсэн ч бүх шинжээч ижил байр суурьтай байгаагүй. Шинэ төхөөрөмжүүдийн нээлтийн тов одоогоор тодорхой биш байгаа тул эцсийн дүгнэлт хийхэд эрт гэж зарим мэргэжилтэн анхааруулж байна. Нөхцөл байдал нааштай өрнөвөл үнэ тогтворжих, цаашлаад буурах боломж ч үгүйсгэхгүй гэж тэд үзэж байна.
Гэсэн хэдий ч одоогийн чиг хандлагаас харахад тоглоомын консолууд аажмаар масс хэрэглээний сегментээс илүү өндөр үнэтэй ангилал руу шилжиж байна. Энэ нь дараагийн үеийн төхөөрөмж авахыг хүсэж буй хэрэглэгчдийн хувьд зардал мэдэгдэхүйц нэмэгдэхийг илтгэж байгаа юм.
