Sony компанийн шинэ загварын PlayStation 5 Pro тоглоомын консол худалдаанд гарсан ч анхны PS5-тай харьцуулахад түүний үйлдвэрлэлийн өртөг тун бага нэмэгдсэн болохыг TechInsights судалгааны байгууллага тогтоожээ. Тус байгууллагын шинжээчдийн тайлангаар, PS5 Pro загварын бүрдэл хэсгүүдийн өртөг ердөө 2 хувиар л нэмэгдсэн байна.
TechInsights-ын мэргэжилтнүүд PS5 Pro-г задлан шинжилж, түүний гол бүрдэл хэсгүүдийн өртгийг тооцоолсон бөгөөд энэ нь зөвхөн үйлдвэрлэлийн зардлыг хамарсан, тээвэр, маркетинг зэрэг зардлыг тусгаагүй дүн юм.
Гэсэн хэдий ч хэрэглэгчдэд зориулсан эцсийн үнэ маш өндөр тогтоогдсон. АНУ-д PS5 Pro загвар 699 ам.доллараар борлуулагдаж байгаа бол энгийн PS5 загвар 399 ам.доллар, дисководтой хувилбар нь 499 ам.долларын үнэтэй байна. Өөрөөр хэлбэл, Pro загвар нь стандарт PS5-оос бараг 40 хувиар илүү үнэтэй байна.
Хамгийн шинэ AMD RDNA 3 процессор PS5 Pro-д ашиглагдаж байгаа бөгөөд энэхүү чип нь нийт өртгийн 19 хувийг бүрдүүлж, ойролцоогоор 109 ам.доллараар үнэлэгдсэн байна. Харьцуулбал, стандарт PS5-ийн хувьд процессорын өртөг нь 31 хувийг эзэлдэг байсан. PS5 Pro загварын хамгийн өндөр өртөгтэй бүрдэл хэсэг нь хадгалах төхөөрөмж юм. 512 ГБ-ын хоёр флаш санах ойн модуль тус бүрийг 77 ам.доллараар үнэлжээ.
PlayStation 5 Pro нь 2024 оны арваннэгдүгээр сард худалдаанд гарсан бөгөөд өндөр хүчин чадалтай ч хэрэглэгчдэд ирэх өртөг нь үйлдвэрлэлийн бодит зардлаас эрс өндөр байгаа нь анхаарал татаж байна.
1 сэтгэгдэл
За, урьдын адил төмөр арай дээр, гэхдээ хамаагүй илүү үнэтэй