Adobe олон жилийн турш “жинхэнэ” Photoshop-гүйгээр гар утсанд зориулсан аппликейшн хөгжүүлсээр ирсэн бол одоо хэрэглэгчдийн хүсэн хүлээсэн мөч ирлээ. 2025 оны эхээр iPhone-д зориулсан хувилбараа гаргасны дараа Adobe амласан ёсоороо Android хэрэглэгчдэд зориулсан Photoshop аппыг албан ёсоор танилцуулж байна. Одоогоор бета хувилбар хэлбэрээр гарсан бөгөөд бүрэн үнэгүй ашиглах боломжтой.
Шинэ аппликейшний гол онцлогууд:
- Давхарга (layers), маск, clone stamp, хувиргалт, зүсэлт (crop) зэрэг үндсэн функцууд
- Generative AI-н тусламжтайгаар объект арилгах, арын дэвсгэр устгах, шинэ элемент нэмэх зэрэг боломжууд
- AI суурьтай сонголт болон нийцтэй бүтээл үүсгэх текст комманд
- Сургалтын хэсэг: Хэрвээ та Photoshop хэрэглэж байгаагүй бол “ламп” дүрс дээр дараад заавруудыг үзэх боломжтой
Энэ бол Adobe-ийн гар утсан дээр Photoshop нэвтрүүлэх гурав дахь оролдлого бөгөөд өмнөх Photoshop Express болон арван жилийн өмнөх Photoshop Touch-оос илүү бүрэн хэмжээний шийдэл болжээ.
Зарим хязгаарлалт:
- Одоогоор шүүлтүүрүүд (filters) байхгүй
- Зүсэлтийг зөвхөн харьцаагаар, харин пикселээр тохируулах боломжгүй
- Content-Aware Fill функц удахгүй нэмэгдэхээр төлөвлөгдөж байгаа
- Апп ашиглахын тулд Adobe-д нэвтрэх шаардлагатай
Энэ бол нэг их гайхах зүйл биш. Учир нь Adobe ирээдүйд энэ апп-д захиалгын төлбөр тогтоох төлөвлөгөөтэй. Одоогоор захиалгын бүтэц тодорхойгүй байгаа ч Lightroom-ийн жишээн дээр үндэслэвэл, зарим үндсэн функц үнэгүй үлдэж, үнэтэй Generative AI зэрэг үйлчилгээнүүд Creative Cloud захиалгад хамрагдах магадлалтай. Creative Cloud-ийн үнэ сүүлд өсч, сарын $20 болсон бөгөөд үүнд ширээний Photoshop болон Lightroom багтдаг.
Техникийн шаардлага:
- Android 11 болон түүнээс дээш хувилбар
- 6GB RAM (8GB бол илүү үр дүнтэй)
- 600MB орчим санах ой
Бета хувилбар хэдий хугацаанд үргэлжлэх нь тодорхойгүй тул туршиж үзэхийг хүсвэл одооноос татаж аваарай.
