Asus компани тоглоомчид болон өндөр гүйцэтгэл шаарддаг хэрэглэгчдэд зориулсан Wi-Fi 7 технологитой шинэ үеийн чиглүүлэгч болох ROG Strix GS-BE18000-г албан ёсоор танилцууллаа. Энэхүү загвар нь нийт 18000 Мб/с хүртэлх онолын хурдтай ажиллах чадвартай бөгөөд 2.4 ГГц, 5 ГГц, 6 ГГц гэсэн гурван давтамжийн зурваст нэгэн зэрэг ажиллана.
Бодит хэрэглээнд тухайн зурвасуудаар дамжих хурд дараах байдлаар хэмжигдэнэ:
- 2.4 ГГц — 688 Мб/с хүртэл
- 5 ГГц — 5764 Мб/с хүртэл
- 6 ГГц — 11,529 Мб/с хүртэл
Одоогоор Wi-Fi 7 болон 6 ГГц зурвасыг дэмждэг төхөөрөмж ховор байгаа ч, ширээний компьютер, зөөврийн төхөөрөмжүүдийг тусгай адаптерээр сайжруулан ашиглах боломжтой. Ийм Wi-Fi 7 картын үнэ гадаадын зах зээл дээр $49 орчим байна.
ROG Strix GS-BE18000 нь 8 ширхэг дотоод антеннтай бөгөөд гаднаа товойлгосон антеннгүй, илүү минималист, даруухан загвартай. Холболтын хувьд:
- 1 WAN порт (интернэт модемд холбогдох зориулалттай)
- 7 Ethernet порт (бүгд 2.5 Гб/с хурд дэмждэг)
- 1 USB 3.2 Gen 1 порт багтжээ
ROG лого бүхий энэхүү төхөөрөмж нь интернетийн урсгалыг ангилан зохицуулах боломжтой тул тоглоомын үеэр гацалтгүй, хурдтай холболт бий болгодог. Түүнчлэн LAN үдэшлэгт зориулан тусдаа SSID үүсгэх, Wi-Fi болон утсан холболтоор mesh сүлжээ үүсгэх боломжтой. Ингэснээр том хэмжээтэй байр, байшинг асуудалгүй бүхэлд нь хамрах сүлжээг байгуулах боломжтой болно.
Сул тал нь — төхөөрөмж одоогоор худалдаанд гараагүй бөгөөд үнийн мэдээлэл ч албан ёсоор зарлагдаагүй байна. Гэхдээ үзүүлэлт, боломжуудыг харвал өндөр үнэтэй байх нь ойлгомжтой.
