Биткойн сүүлийн өдрүүдэд огцом уналттай нүүр тулж, тавдугаар сараас хойш анх удаа $100,000 ам.долларын босгыг доош нэвтэллээ. Тус криптовалют өнөөдөр 3.8%-иар буурч, $98,904 болж унасан бол Ethereum мөн хариу үйлдэл үзүүлэн $2,157 болж буурсан байна. Энэ үзүүлэлтүүд АНУ-ын ерөнхийлөгч Дональд Трампын мэдэгдэлтэй холбоотой. Тэрбээр Ираны гурван гол цөмийн байгууламжид цохилт өгснөө зарласан нь дэлхийн зах зээлд нөлөөлж, хөрөнгө оруулагчдын дунд болгоомжлолыг өдөөжээ.
Үүссэн байдал криптовалютын зах зээлд хүчтэй доргилт авчирсан бөгөөд сүүлийн 24 цагийн дотор нийт $1 тэрбумын криптопозиц задлагдаж, 915 саяын урт байрлалууд, 109 саяын богино байрлалууд хаагдсан байна.
Хэрэв үнэ хэлбэлзэлтэй хэвээр байвал юу болох вэ?
Аналитик шинжээчдийн таамаглалаар биткойны ханш дахин 10%-иар өсвөл крипто арилжаачдын нийт ашиг $15 тэрбумд хүрч болзошгүй. Харин эсрэгээрээ 10%-иар унавал дахин $2 тэрбумын алдагдал хүлээх эрсдэлтэй гэж үзэж байна.
Кибер халдлагын ард Израилийн бүлэг байв
Үүсээд буй санхүүгийн дарамт нэмэгдэхэд хувь нэмэр болсон бас нэг шалтгаан бол өнгөрсөн долоо хоногт Израилийн хактивист Gonjeshke Darande бүлэг Ираны криптовалютын “Nobitex” биржийг хакердаж, $90 саяын дижитал хөрөнгө гаргасан явдал юм. Эдгээр хөрөнгийг тэд дараа нь “устгасан” хэмээн мэдэгдсэн байна.
Криптовалютын зах зээл одоогоор улс төрийн болон геополитикийн тодорхой бус байдлын нөлөөнд хүчтэй автсан хэвээр байна. Зах зээлд итгэл буурсан энэ үеэр алт болон нефтийн үнэ нэмэгдэх төлөвтэй болж, хөрөнгө оруулагчид уламжлалт хөрөнгө рүү шилжих хандлага ажиглагдаж байна.
3 сэтгэгдэл
Биткойн ингэж унах нь айхтар л мэдээ байна даа
Одоо хөрөнгө оруулагчид их хүнд байдалд орж байх шиг байна
Энэ уналт удаан үргэлжилвэл эдийн засагт ч нөлөөлөх байх