OpenAI нь шинэ GPT-5 AI загвараа ChatGPT-ийн үндсэн хувилбар болгон аажмаар нэвтрүүлж байна. Энэ нь бүх хэрэглэгчдэд хүртээмжтэй байх боловч үнэ төлбөргүй хэрэглэгчид тодорхой хязгаарлалттайгаар ашиглах юм.
OpenAI-ийн мэдээлснээр GPT-5-ийг дараах байдлаар хуваарилж байна.
Үнэгүй хэрэглэгчид
Үнэгүй хэрэглэгчид 5 цаг тутамд 10 хүсэлт илгээх боломжтой. Хязгаарт хүрмэгц чатбот автоматаар GPT-5-ийн мини хувилбар руу шилжинэ. Харин GPT-5 Thinking (сэтгэн бодох горим)-д хандах эрх нь өдөрт зөвхөн нэг мессежээр хязгаарлагдана.
ChatGPT Plus хэрэглэгчид ($20/сар)
Plus хэрэглэгчид 3 цаг тутамд 80 хүртэлх хүсэлт илгээх боломжтой. Хязгаарт хүрвэл чатбот мөн адил мини хувилбар руу автоматаар шилжинэ. Гэсэн хэдий ч Plus тарифын хэрэглэгчид GPT-5 Thinking загварыг гараар сонгон, долоо хоногт 200 мессеж илгээх эрхтэй. Автоматаар загвар солигдох тохиолдол нь энэхүү долоо хоногийн хязгаарт тооцогдохгүй.
ChatGPT Pro хэрэглэгчид ($200/сар)
ChatGPT Pro багц нь сард 200 доллароор үнэлэгддэг бөгөөд автоматжуулсан, программчлагдсан буруу хэрэглээ байхгүй тохиолдолд GPT-5-д хязгааргүй нэвтрэх боломж олгоно. Үүнд өгөгдөл олборлох, гуравдагч этгээдэд данс дамжуулах, эсвэл ChatGPT-ийн хандалтыг дахин худалдах зэрэг үйлдлүүд хамаарахгүй.
GPT-5 нь OpenAI-ийн анхны “нэгдмэл” AI загвар бөгөөд хурдан хариу үйлдлийг гүнзгий сэтгэн бодох чадвартай хослуулсан гэдгээрээ онцлог. Мөн загвар нь энгийн болон үндэслэлтэй (thinking) горимуудын хооронд автоматаар шилжих чадвартай. GPT-5 нь бичвэр боловсруулах, код бичих, эрүүл мэндийн мэдээлэлд дүн шинжилгээ хийх чиглэлээр өмнөх загваруудаас илүү гүйцэтгэл үзүүлж, алдаатай эсвэл “хий үзэгдэл” маягийн хариулт багатай болсон байна.
OpenAI энэхүү загварыг “нэн даруй” нэвтрүүлж эхэлснээ зарласан ч одоогоор бүх хэрэглэгч GPT-5-д бүрэн хандах боломжгүй байна. Шинэчлэлтийг үе шаттайгаар тарааж байгаа тул зарим хэрэглэгчид тодорхой хугацаанд хүлээх шаардлагатай. GPT-5 ChatGPT-ийн веб хувилбар дээр идэвхжих үед шинэ, өнгөт кодтой интерфейс дээр “GPT-5-ийг танилцуулж байна: ChatGPT одоо бидний хамгийн ухаалаг, хурдан бөгөөд хамгийн хэрэгтэй загварыг ашиглаж байна” гэсэн мэдэгдэл гарч ирэх юм.
