Хоёр дахь дэлгэцтэй шинэ шийдэл
Xiaomi компани удахгүй танилцуулах Xiaomi 17 цувралынхаа тэргүүлэх загварууд болох 17 Pro болон 17 Pro Max-ийн дизайныг албан ёсоор зарлалаа. Тус компани Weibo хуудсаараа дамжуулан шинэ загварын тизер нийтэлсэн бөгөөд хамгийн их анхаарал татсан шинэчлэл нь арын самбар дээр байрласан нэмэлт дэлгэц буюу Magic Back Screen байлаа.
Энэхүү хоёр дахь дэлгэц нь зөвхөн цаг, цэнэгийн түвшин, хөдөлгөөнт ханын зураг, программын мэдэгдэл харуулахаас гадна үндсэн камераар селфи хийх боломж олгож байна. Ингэснээр хэрэглэгчид урд камер ашиглалгүйгээр өндөр чанартай зураг авах давуу талтай болжээ.
Хөгжлийн түүх ба өмнөх туршлага
Xiaomi өмнө нь ижил төстэй санааг туршиж байсан. Тодруулбал, 2021 онд танилцуулсан Mi 11 Ultra загварт 1.1 инчийн жижиг AMOLED нэмэлт дэлгэцтэй байсан. Харин энэ удаагийн Magic Back Screen нь илүү олон боломж, өргөн хүрээтэй хэрэглээг санал болгож байна. Төхөөрөмжийн бүх үйлдлийн жагсаалтыг албан ёсны танилцуулга дээр дэлгэхээр төлөвлөжээ.
Дотоод үзүүлэлтүүд
Дизайны шинэ шийдлээс гадна Xiaomi 17 Pro болон 17 Pro Max нь Snapdragon 8 Elite Gen 5 процессортой анхны ухаалаг гар утаснууд болж, хүчин чадал, гүйцэтгэлээрээ дээд түвшинд хүрнэ гэж тооцогдож байна. Мөн камерын системийг Leica компанитай хамтран бүтээсэн нь фото, видео чанарын хувьд хэрэглэгчдэд шинэ түвшний туршлагыг өгнө гэсэн хүлээлтийг бий болгожээ.
Танилцуулгын тов
Xiaomi 17, 17 Pro, 17 Pro Max цувралын албан ёсны танилцуулга энэ сард болох ч яг огноог компани хараахан зарлаагүй байна. Гэсэн ч шинжээчид уг шинэ цуврал нь 2025 оны хамгийн их шуугиан тарьсан ухаалаг гар утаснуудын нэг болох нь гарцаагүй гэж онцолж байна.
2 сэтгэгдэл
Xiaomi-гийн шинэ загвар гоё харагдаж байна
Үнэ нь боломжийн байвал авмаар юм