Германы Карлсруэгийн Технологийн Хүрээлэнгийн (KIT) судлаачид Wi-Fi чиглүүлэгчийн энгийн радио дохиог ашиглан ухаалаг утас болон холбогдсон ямар ч төхөөрөмжгүйгээр хүнийг тодорхойлох шинэ аргыг боловсруулжээ. Энэхүү технологи нь стандарт Wi-Fi төхөөрөмжүүдийн хоорондын долгионы харилцан үйлчлэлд дүн шинжилгээ хийж, хүний байрлал, хөдөлгөөн, дүрсийг “радио зураг” хэлбэрээр дахин бүтээдэг гэж Interesting Engineering мэдээлсэн байна.
Радио долгионоор хүнийг “харж” болно
KASTEL хүрээлэнгийн профессор Торстен Струф тайлбарлахдаа:
“Радио долгион нь гэрлийн камер шиг орон зайн дүрсийг үүсгэж чадна. Сүлжээний доторх дохионы тусгал, өөрчлөлтийг бүртгэснээр систем нь холбогдсон төхөөрөмжгүй байсан ч хүний хөдөлгөөн, байрлалыг нарийн тодорхойлдог” гэжээ.
Энэ нь Wi-Fi дохио ашиглан орчныг хянах, хүмүүсийн хөдөлгөөнийг илрүүлэх бүрэн боломжтойг харуулж байна.
Тандалт хийх шинэ эрсдэл
Судлаач Жулиан Тодт Wi-Fi сүлжээ нь хяналтын хэрэгсэл болж хувирах эрсдэлийг анхааруулжээ. Түүний хэлснээр, Wi-Fi холболттой кафе эсвэл байгууллагын ойролцоо өнгөрөхөд л тухайн хүний хөдөлгөөний ул мөр бүртгэгдэх боломжтой. Энэ нь төрийн болон хувийн байгууллагууд хүний оршин байдал, хөдөлгөөнийг илүү нарийн хянах нөхцөл бүрдүүлж байгааг илтгэж байна.
Тусгай тоног төхөөрөмж шаардахгүй
Өмнөх судалгаануудад ашигладаг LIDAR эсвэл CSI мэдрэгчээс ялгаатай нь энэхүү шинэ арга нь зөвхөн стандарт Wi-Fi чиглүүлэгч ашигладаг. Технологи нь BFI (Beamforming Feedback Information) өгөгдлийн шинжилгээнд тулгуурладаг бөгөөд хиймэл оюун ухаан эдгээр өгөгдлийг боловсруулж, тухайн орон зай дахь хүний “радио дүрс”-ийг бүрдүүлдэг.
Туршилтын үр дүн
197 хүнийг хамруулсан туршилтаар уг систем бараг 100 хувийн нарийвчлалтайгаар хүнийг таньж чаджээ. Судлаачдын мэдээлснээр, AI загвар нь хүнийг хэдхэн секундын дотор таньж, алхах хэв маяг болон харцны чиглэлээс үл хамааран ялгаж чаддаг байна.
Ёс зүйн болон хууль эрх зүйн сорилт
Судалгааны багийнхан энэхүү технологи өргөн хэрэглээнд нэвтэрвэл иргэний нууц, хувийн орон зайд заналхийлэх аюултай гэж анхааруулжээ. Wi-Fi нь бараг бүх нийтийн газар байдаг тул ийм системийг ашиглан шинэ тандалтын дэд бүтэц үүсэх эрсдэлтэй гэлээ.
Тэд технологийн хэрэглээнд зохицуулалт, хяналтын механизм шаардлагатай бөгөөд эс бөгөөс энэ систем төрийн болон хувийн байгууллагын масс тандалтын хэрэгсэл болох аюултай хэмээн анхааруулсан байна.
