Meta компани ажлын компьютерт хийж буй ажилтнуудын үйлдлийн мэдээллийг цуглуулж эхлэхээр болжээ. Үүнд хулганын хөдөлгөөн, товшилт, гарын товчлуурын даралт зэрэг багтах бөгөөд эдгээр өгөгдлийг хиймэл оюуны загваруудыг сургахад ашиглах аж.
Энэ ажил нь Model Capability Initiative (MCI) нэртэй дотоод хэрэгслээр хэрэгжинэ. Уг систем нь ажлын хэрэглээний программууд болон вэбсайтуудтай харилцан ажиллахаас гадна тодорхой давтамжаар дэлгэцийн зураг авч, тухайн нөхцөл байдлын нэмэлт мэдээллийг бүрдүүлэх юм байна.
AI агентуудыг хүний адил интерфэйстэй ажиллуулна
Төслийн гол зорилго нь AI агентуудыг хүмүүсийн адил интерфэйстэй харилцаж сургах явдал гэж тайлбарлажээ. Өөрөөр хэлбэл, цэснээс тохиргоо сонгох, халуун товч ашиглах, төрөл бүрийн аппликейшн дотор зөв чиглэн ажиллах чадварыг нь сайжруулахад энэ өгөгдөл ашиглагдана.
Компанийн зүгээс цуглуулсан мэдээллийг ажилтнуудын бүтээмж, гүйцэтгэлийг үнэлэхэд ашиглахгүй, зөвхөн загвар сургах зориулалтаар хэрэглэнэ гэж мэдэгдсэн байна. Мөн эмзэг, нууц мэдээллийг хамгаалах тодорхой хамгаалалтын механизм бий гэж дурдсан ч яг ямар арга хэмжээ авч буйгаа дэлгэрэнгүй тайлбарлаагүй байна.
Meta AI-д төвлөрсөн шинэ бүтэц рүү хурдтай шилжиж байна
Энэхүү санаачилга нь Meta компанийн илүү өргөн хүрээтэй AI-first стратегийн нэг хэсэг болж байна. Тус компани ажлын процессууддаа AI агентуудыг идэвхтэй нэвтрүүлж эхэлсэн бөгөөд ажилтнуудаа өдөр тутмын ажлуудадаа ийм хэрэгслүүдийг ашиглахыг ч түлхүү дэмжиж байгаа юм.
Meta-гийн техникийн захирал Эндрю Босворт өмнө нь компани AI агентууд үндсэн ажлыг гүйцэтгэж, хүмүүс тэдгээрийг хянаж, шаардлагатай үед засварлаж байх тогтолцоо бий болгохыг зорьж байгаа гэж мэдэгдэж байсан.
Эдгээр өөрчлөлт нь компанийн томоохон шинэчлэлийн үеэр явагдаж байна. Meta дэлхий даяар нийт ажилтныхаа ойролцоогоор 10 хувийг цомхотгохоор төлөвлөж байгаа бөгөөд багуудынхаа бүтцийг AI чиглэлийн дагуу дахин зохион байгуулж байгаа аж.
Үүнээс өмнө Meta өөрийн шинэ AI загвар болох Muse Spark-ийг танилцуулсан талаар мэдээлж байсан. Энэ нь жил ч хүрэхгүй хугацааны өмнө байгуулагдсан Superintelligence Labs нэгжийн хүрээнд гарсан анхны нээлттэй бүтээгдэхүүн бөгөөд компани үүнийг AI чиглэлийн бүрэн шинэ эхлэл гэж тодорхойлж байна.
