Samsung Electronics 2026 оны гуравдугаар улирлын санхүүгийн тайлангаа танилцуулж, орлого болон үйл ажиллагааны ашгийн хэмжээгээр шинэ дээд үзүүлэлт тогтоосноо мэдээлжээ.
Компанийн нэгдсэн орлого 195.3 их наяд вон буюу ойролцоогоор 146 тэрбум ам.долларт хүрсэн бол үйл ажиллагааны ашиг 107.4 их наяд вон буюу 80 орчим тэрбум ам.доллар болсон байна.
Өмнөх улиралтай харьцуулахад орлого 14 хувиар, үйл ажиллагааны ашиг ойролцоогоор 20 хувиар өсжээ. Хоёрдугаар улиралд Samsung 171.5 их наяд воны орлого, 89.5 их наяд воны үйл ажиллагааны ашигтай ажилласан байна.
Компанийн мэдээлснээр улирлын үйл ажиллагааны ашиг нь 100 их наяд воны босгыг давсан дэлхийн анхны технологийн корпораци болсон гэжээ.
Гол өсөлтийг хагас дамжуулагчийн бизнес авчирсан
Энэ удаагийн санхүүгийн өсөлтийн үндсэн хөдөлгөгч нь Device Solutions буюу хагас дамжуулагчийн бизнес байжээ.
Тус нэгжийн орлого 147.1 их наяд вон буюу ойролцоогоор 110 тэрбум ам.долларт хүрсэн бол үйл ажиллагааны ашиг нь 106.5 их наяд вон буюу бараг 80 тэрбум ам.доллар болсон байна.
Ялангуяа хиймэл оюуны системд ашиглагддаг HBM4 санах ой, серверийн RAM болон SSD бүтээгдэхүүний эрэлт эрс нэмэгдсэн нь тус нэгжийн үзүүлэлтэд хамгийн их нөлөөлжээ.
Өгөгдлийн төвүүдийн хүчин чадлыг нэмэгдүүлэх, AI тооцооллын дэд бүтцийг өргөжүүлэх чиг хандлага эрчимжсэнээр өндөр хүчин чадалтай санах ойн бүтээгдэхүүний зах зээлд эрэлт огцом өссөн байна.
2027 онд ч эрэлт өндөр хэвээр байна гэж Samsung тооцоолжээ
Samsung дөрөвдүгээр улиралд санах ойн бүтээгдэхүүний хомсдол болон дата төвүүдийн өндөр эрэлт үргэлжилнэ гэж үзэж байна.
Мөн 2027 онд хиймэл оюуны дэд бүтцийн хөрөнгө оруулалт цаашид нэмэгдэж, санах ойн эрэлт салбарын үйлдвэрлэлийн хүчин чадлаа нэмэгдүүлэх хурдаас ч илүү өсөж болзошгүй гэж таамаглажээ.
Ийм нөхцөл байдал үргэлжилбэл өндөр хүчин чадалтай санах ой болон серверийн хадгалалтын төхөөрөмж Samsung-ийн орлогын гол эх үүсвэр хэвээр үлдэх төлөвтэй байна.
Харин хэрэглээний төхөөрөмжийн бизнес алдагдалтай ажиллав
Нөгөө талд смартфон болон бусад хэрэглээний электроникийг багтаадаг Device eXperience буюу DX бизнес гуравдугаар улирлыг алдагдалтай дуусгажээ.
Орлого нь өссөн хэдий ч тус нэгжийн үйл ажиллагааны алдагдал 0.8 их наяд вон буюу ойролцоогоор 600 сая ам.доллар болсон байна.
Үүнд эд ангиудын үнэ өссөн, ялангуяа санах ойн бүтээгдэхүүний өртөг нэмэгдсэн нь голлон нөлөөлжээ.
Мобайл бизнес ч төхөөрөмж үйлдвэрлэх нийт өртөг өссөнтэй тулгарсан байна.
Samsung төсөвт ангиллын ухаалаг утаснуудыг өөрийн өртгөөс доогуур үнээр зарсантай алдагдлыг шууд холбохгүй байгаа ч эд ангийн үнэ нэмэгдсэн нь хэрэглээний төхөөрөмжийн бизнесийн ашгийн түвшинд ихээхэн дарамт болж байгааг хүлээн зөвшөөрчээ.
Ингэснээр Samsung-ийн нэг талд AI болон дата төвүүдийн эрэлтээс ашиг хүртэж буй хагас дамжуулагчийн бизнес эрчимтэй өсөж байгаа бол нөгөө талд хэрэглээний төхөөрөмжийн нэгж өндөр өртөгтэй эд ангийн дарамтад орсон дүр зураг харагдаж байна.
