Nvidia компанийн гүйцэтгэх захирал Jensen Huang Казахстан улсад хийсэн анхны айлчлалынхаа үеэр тус улсыг “физик хиймэл оюун ухаан” буюу Physical AI-ийн дэлхийн төв болгон хөгжүүлэх санал дэвшүүлжээ.
Казахстаны Ерөнхийлөгчийн хэвлэлийн албанаас мэдээлснээр Jensen Huang аравдугаар сарын 23-нд Астана хотод Ерөнхийлөгч Kassym-Jomart Tokayev-той уулзахдаа уг санаачилгыг танилцуулсан байна.
Тэрбээр Казахстаныг хиймэл оюун ухааныг идэвхтэй хөгжүүлж, эдийн засаг болон нийгмийн олон салбарт өргөн нэвтрүүлэх зорилготой улс болгон хувиргах Tokayev-ын стратегийн чиглэлийг өндрөөр үнэлжээ.
Математик, шинжлэх ухааны чадвар чухал гэж онцлов
Nvidia-ийн тэргүүн хиймэл оюун ухааны салбарт тогтвортой амжилт гаргахын тулд шинжлэх ухаан, математик болон технологийн чиглэлээр өндөр мэдлэг, ур чадвартай мэргэжилтнүүд зайлшгүй шаардлагатайг онцолсон байна.
Мөн тэрбээр сүүлийн нэг жилийн хугацаанд Казахстаны технологийн компаниудтай хамтран ажилласнаар тодорхой ахиц гарсныг дурджээ.
Jensen Huang:
“Бид Firebird AI KZ Ltd, Kazakhtelecom зэрэг Казахстаны компаниудтай түншлэлээ хөгжүүлж байгаа бөгөөд дэлхийн технологийн экосистемийн чухал оролцогч болсон Казахстаны анхны технологийн ‘unicorn’ (тэрбум доллароос дээш үнэлгээтэй стартап) болох Higgsfield компанийг дэмжин ажиллаж байна. Бидний хамтдаа хийж бүтээсэн зүйлс надад гүн сэтгэгдэл, бахархал төрүүлдэг”
гэж хэлсэн байна.
Энэ нь Nvidia Казахстаны хиймэл оюун ухаан, тооцоолол болон технологийн дэд бүтцийн салбарт хамтын ажиллагаагаа цаашид өргөжүүлэх сонирхолтой байгааг харуулж байна.
Tokayev Nvidia-ийн оролцоог үнэлжээ
Хариуд нь Казахстаны Ерөнхийлөгч Kassym-Jomart Tokayev тус улсын хиймэл оюун ухааны экосистемийг хөгжүүлэхэд Nvidia компанийн оруулж буй хувь нэмэрт талархал илэрхийлсэн байна.
Тэрбээр АНУ-ын технологийн компанийн удирдлагын энэхүү айлчлал нь Казахстан болон Nvidia-ийн хамтын ажиллагааг дараагийн шатанд гаргахад чухал түлхэц болно гэдэгт итгэлтэй байгаагаа мөн илэрхийлжээ.
Казахстан сүүлийн жилүүдэд хиймэл оюун ухаан, дата төв, дижитал дэд бүтэц болон өндөр технологийн салбарыг хөгжүүлэхэд илүү анхаарч байгаа бөгөөд Nvidia-тай хийх хамтын ажиллагаа нь энэ чиглэлийн нэг хэсэг болох төлөвтэй байна.
Хэрэв Jensen Huang-ийн дэвшүүлсэн санал бодит төсөл, хөрөнгө оруулалтаар үргэлжилбэл Казахстан “Physical AI” буюу бодит төхөөрөмж, робот, үйлдвэрлэлийн системтэй шууд уялдан ажилладаг хиймэл оюун ухааны технологийн бүс нутгийн томоохон төв болох боломжтой.
