Apple аравдугаар сарын 28-нд шинэ төхөөрөмжүүдийн цуврал танилцуулга хийхээр төлөвлөж байгаа гэх мэдээлэл гарчээ. “Pro and Tell” нэртэй энэхүү арга хэмжээний гол онцлох бүтээгдэхүүн нь шинэ MacBook Pro байх бөгөөд Apple анх удаа мэдрэгчтэй OLED дэлгэцтэй зөөврийн компьютер танилцуулж магадгүй байна.
Эх сурвалжийн мэдээлснээр уг арга хэмжээг уламжлалт шууд дамжуулалтын хэлбэрээр зохион байгуулахгүй аж. Харин Apple сонгогдсон сэтгүүлчдийг Лос-Анжелес хотод урьж, шинэ төхөөрөмжүүдтэй биечлэн танилцах боломж олгох бөгөөд бусад бүтээгдэхүүний мэдээллийг хэвлэлийн мэдээгээр тараах төлөвтэй байна.
Apple аравдугаар сарын 13-нд болсон “Welcome Home” арга хэмжээний үеэр ч үүнтэй төстэй хэлбэрээр шинэ бүтээгдэхүүнүүдээ танилцуулсан гэх мэдээлэл бий.
MacBook Pro анх удаа OLED, мэдрэгчтэй дэлгэцтэй болж магадгүй
Хамгийн их анхаарал татаж буй бүтээгдэхүүн нь 14 болон 16 инчийн дээд ангиллын MacBook Pro загварууд юм.
Эх сурвалжийн мэдээлснээр эдгээр нь Mac компьютерын түүхэнд анх удаа OLED дэлгэцтэй болох төлөвтэй байна. OLED технологи нь илүү гүн хар өнгө, өндөр контраст, тод өнгө болон эрчим хүчний илүү үр ашигтай хэрэглээ санал болгодог.
Үүнээс гадна дэлгэц мэдрэгчтэй болж магадгүй гэх мэдээлэл байгаа бөгөөд macOS 27-д мэдрэгчээр удирдах дохио, хөдөлгөөний шинэ дэмжлэг нэмэгдэх төлөвтэй байна.
Гэсэн ч Apple уламжлалт гар болон трекпадыг хэвээр үлдээх бөгөөд мэдрэгчтэй дэлгэцийг нэмэлт удирдлагын хэлбэр болгон ашиглахаар төлөвлөж байгаа аж.
Шинэ дэлгэцтэй холбоотойгоор зөөврийн компьютерын хийцэд ч өөрчлөлт орж магадгүй. Дэлгэцэд хүрэх үед савлахгүй байлгахын тулд нугасны механизмыг илүү бат бөх болгох бөгөөд төхөөрөмжийн нийт жинг одоогийн загваруудаас бууруулах зорилготой гэж мэдээлжээ.
Мөн дэлгэцийн дээд хэсэгт байдаг уламжлалт ховилыг халж, iPhone-оос танил болсон Dynamic Island-тэй төстэй интерактив хэсэг ашиглах магадлалтай байна.
Харин дээд ангиллын шинэ MacBook Pro-гийн процессорт том өөрчлөлт гарахгүй байж магадгүй. Эх сурвалжийн таамгаар 14, 16 инчийн загварууд M5 Pro болон M5 Max чиптэй хэвээр байх боломжтой.
Apple M6 Pro болон M6 Max үеийг алгасаж, дараагийн M7 Pro, M7 Max чипүүдийг 2027 оны сүүлчээр танилцуулах хувилбар яригдаж байгаа аж.
Мөн Apple одоо борлуулагдаж буй MacBook Pro загваруудаа зах зээлээс бүрэн хасахгүй, OLED дэлгэцтэй хувилбарыг илүү өндөр үнэтэй сонголт хэлбэрээр зэрэгцүүлэн худалдаалах магадлалтай байна.
Өмнө нь OLED дэлгэцтэй шинэ загварыг “MacBook Ultra” гэж нэрлэж магадгүй гэх цуурхал гарч байсан ч сүүлийн мэдээллээр Apple “MacBook Pro” нэрээ хэвээр хадгалах төлөвтэй байгаа аж.
iMac, суурь MacBook Pro болон iPad mini ч шинэчлэгдэж магадгүй
Зөвхөн өндөр үнэтэй MacBook Pro бус, илүү хүртээмжтэй төхөөрөмжүүдэд ч шинэчлэлт хийхээр төлөвлөж байгаа гэх мэдээлэл байна.
2025 оны аравдугаар сараас M5 чип ашиглаж байгаа суурь 14 инчийн MacBook Pro шинэ M6 процессорт шилжих төлөвтэй. Мөн 24 инчийн iMac ижил M6 чип авах магадлалтай байна.
Эдгээр загварын гаднах дизайн одоогийнхоос бараг өөрчлөгдөхгүй, гол шинэчлэл нь дотоод хүчин чадалд төвлөрөх төлөвтэй гэж мэдээлжээ.
Танилцуулгын бас нэг сонирхолтой бүтээгдэхүүн нь iPad mini 8 байж магадгүй.
Эх сурвалжийн мэдээлснээр шинэ iPad mini анх удаа OLED дэлгэцтэй болох боломжтой. Ингэвэл OLED дэлгэц iPad Pro-оос гадна өөр цувралд нэвтэрч буй анхны тохиолдол болно.
Мөн Apple уламжлалт чанга яригчийн нүхнүүдийг халж, төхөөрөмжийн их биеийг чичиргээгээр дуу гаргадаг системээр тоноглох хувилбар судалж байгаа гэх мэдээлэл байна.
Ингэснээр ус нэвтрэх эрсдэлийг бууруулж, iPad mini-г Apple-ийн албан ёсны ус, тоосны хамгаалалтын IP зэрэглэлтэй анхны iPad болгох боломжтой гэж үзэж байна.
Хэрэв энэ мэдээлэл үнэн бол төхөөрөмж зөвхөн усны цацалтад тэсвэртэй байхаас гадна тодорхой нөхцөлд богино хугацаанд усанд дүрэхэд ч хамгаалалттай байж магадгүй.
iPad mini 8-ийн дотор iPhone 18 Pro-д ашиглагдаж буй A20 Pro процессор суурилуулах төлөвтэй гэх мэдээлэл мөн гарчээ.
Фронт камерын байрлалыг богино талаас нь урт тал руу шилжүүлэх бөгөөд энэ нь Apple-ийн бусад iPad загваруудад хэдийн хэрэглэгдэж эхэлсэн шийдэл юм.
Харин дэлгэцийн шинэчлэлтийн давтамж 60 Гц хэвээр үлдэх үү, эсвэл 120 Гц-ийн ProMotion дэмжлэг авах уу гэдэг нь одоогоор тодорхойгүй байна.
Үнэ өсөх магадлал ч өндөр байна. Одоогийн iPad mini 599 ам.долларын үнэтэй байгаа бол шинэ OLED хувилбар ойролцоогоор 200 ам.доллараар үнэтэй болж магадгүй гэх урьдчилсан мэдээлэл байна.
Мөн OLED дэлгэц болон мэдрэгчтэй бүрэлдэхүүн нэмэгдсэнээр 14, 16 инчийн MacBook Pro загваруудын үнэ одоогийнхоос мэдэгдэхүйц өсөх төлөвтэй байна.
Одоогоор эдгээр мэдээллийн тодорхой хэсэг нь албан ёсны бус эх сурвалж, урьдчилсан таамагт тулгуурлаж байгаа тул аравдугаар сарын 28-ны танилцуулгын үеэр Apple яг ямар төхөөрөмж, ямар техникийн үзүүлэлттэйгээр танилцуулах нь эцэслэн тодорхой болох юм.
