Технологийн салбарын тэрбумтан Илон Маск өөрийн хамгийн том компаниудын хоёр болох Tesla болон SpaceX-ийг нэгтгэх боломжийг нухацтай авч үзэж байгаагаа мэдэгдсэн байна. Хэрэв ийм хэлцэл хэрэгжвэл технологийн салбарын төдийгүй дэлхийн бизнесийн түүхэн дэх хамгийн том нэгдлүүдийн нэг болох боломжтой гэж эх сурвалжид дурджээ.
Мягмар гарагт SpaceX компанийн улирлын санхүүгийн үр дүнг танилцуулах үеэр Маск уг санааны талаар:
“Энэ санаа надад таалагдаж байгаа юу гэж үү? Тийм ээ”
хэмээн хэлсэн байна.
Гэхдээ хоёр компанийг нэгтгэхийн тулд зөвхөн удирдлагын түвшний шийдвэр хангалтгүй бөгөөд хувьцаа эзэмшигчдийн дэмжлэг шаардлагатай. Маскийн мэдээлснээр Tesla болон SpaceX компанийн хүрээнд нэгдлийн боломжит нөхцөлүүдийг судлах тусгай хороод хэдийн байгуулагджээ.
Тэрбээр:
“Тусгай хороод нэгтгэх нөхцөлүүдийн талаар хараахан тохиролцоонд хүрээгүй, цаашид тохиролцоно гэсэн баталгаа ч байхгүй. Гэхдээ хоёр компанийг нэгтгэх нь олон давуу талтай бөгөөд ихээхэн үр өгөөж авчирна гэж би бодож байна”
гэж мэдэгдсэн байна.
Эх сурвалжийн мэдээлснээр Tesla-ийн зах зээлийн үнэлгээ ойролцоогоор 1.5 их наяд ам.доллар, SpaceX-ийнх 2 их наяд ам.долларт хүрсэн гэж тооцогдож байгаа аж. Иймээс хоёр компанийг нэг бүтэц дор нэгтгэвэл нийт үнэлгээ нь хэдэн их наяд ам.долларт хүрэх хэмжээний аварга технологийн корпораци бий болох боломжтой.
SpaceX-ийн хувьцааны ханш мягмар гарагийн үндсэн арилжаа хаагдсаны дараах арилжаанд 8 хувиар өссөн гэж мэдээлжээ.
Маск компаниудаа нэг бүтэц дор төвлөрүүлэх хандлагаа үргэлжлүүлж байна
Сүүлийн нэг жилийн хугацаанд Маск өөрийн эзэмшлийн хэд хэдэн компанийг цөөн тооны том бүтцийн хүрээнд нэгтгэх алхмууд хийж байгаа талаар эх сурвалжид дурдсан байна.
Тухайлбал энэ оны эхээр SpaceX компани xAI болон өмнө нь Twitter нэртэй байсан X платформыг өөрийн бүтцэд нэгтгэсэн гэж мэдээлжээ.
Үүнээс гадна Tesla, SpaceX хоёр компьютерын чип үйлдвэрлэх “Terafab” төсөл дээр хамтран ажиллаж эхэлсэн байна. Энэ нь Маск өөрийн компаниудын нөөц, технологи, инженерийн багуудыг нэг дор ажиллуулах нь тус тусдаа үйл ажиллагаа явуулснаас илүү үр ашигтай гэж үзэж байгаагийн нэг жишээ гэж тайлбарлажээ.
Мягмар гарагийн хурлын үеэр Маск Tesla болон SpaceX-ийг бүрэн нэгтгэвэл чип, хиймэл оюун ухаан, программ хангамж болон бусад чиглэлд одоо тусдаа явагдаж буй төслүүдийг илүү оновчтой уялдуулах боломжтой гэж үзэж байгаагаа илэрхийлсэн байна.
Гэхдээ нэгдлийн асуудлыг хэлэлцэж буй тусгай хороодын аль алинд нь өөрөө оролцоогүй гэдгээ Маск баталжээ.
Тэр Tesla болон SpaceX-ийн гүйцэтгэх захирлын хувьд өөрийгөө “ашиг сонирхлын зөрчилтэй этгээд” гэж тодорхойлсон байна.
Мөн хоёр компанийг нэгтгэх боломжийн талаар:
“тэсрэх бөмбөгтэй талбай дээр бүжиглэхтэй адил”
хэмээн тодорхойлжээ.
Энэ нь хэлцэл санхүү, хууль, хувьцаа эзэмшигчдийн эрх ашиг, компанийн үнэлгээ болон зохицуулалтын олон төвөгтэй асуудал дагуулахыг хэлсэн хэрэг гэж тайлбарлаж байна.
Tesla-ийн хувьцаа эзэмшигчдийн дор хаяж 50 хувь нь нэгдлийг дэмжих шаардлагатай бөгөөд Маск энэ босгыг:
“давахад нэлээд өндөр саад”
гэж үнэлсэн байна.
Гэхдээ Tesla-ийн хөрөнгө оруулагчид өмнө нь Маскийн томоохон санаачилгуудыг дэмжиж байсан тохиолдол бий. Тухайлбал өнгөрсөн онд хөрөнгө оруулагчдын олонх нь Маскт ойролцоогоор 1 их наяд ам.долларт үнэлэгдэх урамшууллын багц олгохыг дэмжсэн талаар эх сурвалжид дурджээ.
Tesla цахилгаан автомашин үйлдвэрлэгч гэдгээрээ хамгийн сайн танигдсан ч Маск сүүлийн жилүүдэд компанийн үйл ажиллагааг робот техник, хиймэл оюун ухаан болон автоматжуулалтын чиглэл рүү улам түлхүү чиглүүлж байгаа аж.
Харин SpaceX сансрын пуужин, Starlink хиймэл дагуулын интернетийн сүлжээгээрээ алдартай. Эх сурвалжийн мэдээлснээр тус компани хөрөнгийн зах зээлд гарсныхаа дараа үнэлгээгээр Tesla-г богино хугацаанд гүйцэж түрүүлсэн байна.
Мөн SpaceX уламжлалт сансрын бизнесээсээ гадна үйл ажиллагаагаа өргөжүүлж, Anthropic, Google зэрэг технологийн компаниудад үүлэн тооцооллын хүчин чадал санал болгож эхэлсэн гэж мэдээлжээ.
Энэхүү чиглэл нь одоогоор SpaceX-ийн хамгийн ашигтай бизнесийн нэг болж, сүүлийн улиралд 7.5 тэрбум ам.долларын орлого бүрдүүлсэн гэх мэдээлэл байна. Гэсэн ч компанийн нийт санхүүгийн үзүүлэлтээр 2026 онд одоогоор 1.1 тэрбум ам.долларын алдагдалтай ажиллаж байгаа аж.
Хэрэв Tesla болон SpaceX-ийг нэгтгэх санал цааш ахивал нэгдлийн бүтэц, хувьцааны харьцаа, компанийн үнэлгээ, удирдлага болон зохицуулагч байгууллагуудын зөвшөөрөл зэрэг асуудал дараагийн гол сорилт болох юм.
Одоогоор тусгай хороод эцсийн тохиролцоонд хүрээгүй бөгөөд нэгдэл заавал хэрэгжинэ гэсэн баталгаа байхгүй хэвээр байна.
