Android хэрэглэгчдийн анхаарлыг татсан нэгэн тохиргоо сүүлийн үед цахим орчинд идэвхтэй яригдаж байна. Google зарим Android төхөөрөмж дээр утасны дугаарыг автоматаар баталгаажуулж, тухайн смартфонд нэвтэрсэн Google-ийн бүх бүртгэлтэй холбож болох аж.
Энэ нь зөвхөн хувийн үндсэн бүртгэлээр хязгаарлагдахгүй. Ажил, туршилт эсвэл өөр зориулалтаар ашигладаг нэмэлт Google бүртгэлүүд ч уг механизмд хамрагдаж болох бөгөөд тохиргоо анхнаасаа идэвхтэй байх тохиолдол бий.
Зарим хэрэглэгч дугаар нь өөр бүртгэлтэй холбогдсоныг Google-ээс “утасны дугаар баталгаажсан” тухай имэйл ирсний дараа л мэдсэн байна.
Мөн энэ механизм зөвхөн тухайн үед төхөөрөмж дээр байгаа бүртгэлүүдэд бус, цаашид нэмж оруулах Google бүртгэлүүдэд ч үйлчилж болох талаар мэдээлжээ.
Google өөрийн тусламжийн баримт бичигт энэ боломжийн талаар тайлбарласан байдаг. Компанийн мэдээлснээр баталгаажуулсан утасны дугаар нь бүртгэлд нэвтрэх, нууц үг сэргээх, зарим үйлчилгээ, тухайлбал RCS мессежийн ажиллагаанд ашиглагдаж болно.
Гэхдээ зарим хэрэглэгчийн хувьд гол асуудал нь дугаарыг олон бүртгэлтэй холбохдоо тусгайлан зөвшөөрөл хүсэхгүй байж болох явдал юм.
Android дээр дугаар автоматаар баталгаажуулахыг хэрхэн унтраах вэ?
Утасны дугаарыг автоматаар баталгаажуулах тохиргоог Android-ийн системийн цэснээс өөрчилж болно.
- Смартфоныхоо Тохиргоо хэсгийг нээнэ.
- Google эсвэл зарим төхөөрөмж дээрх Google services хэсэг рүү орно.
- All services буюу бүх үйлчилгээг сонгоно.
- Privacy & security хэсгийг олно.
- Phone number verification тохиргоог нээнэ.
- Automatically verify phone numbers сонголтыг унтраана.
Гэхдээ энэ тохиргоог унтраалаа гээд Google өмнө нь бүртгэлүүдтэй холбосон утасны дугаарыг автоматаар устгахгүй.
Хэрэв тодорхой Google бүртгэлээс дугаараа салгахыг хүсвэл тухайн бүртгэлийн тохиргоо руу тусад нь орох шаардлагатай.
Үүний тулд Google Account хэсгээс Personal info → Phone гэсэн дарааллаар орж, холбогдсон дугаараа сонгон устгана. Хэрэв утсан дээр хэд хэдэн Google бүртгэл ашигладаг бол дугаар шаардлагагүй бүртгэл бүр дээр энэ үйлдлийг давтаж хийх хэрэгтэй.
Зарим хэрэглэгч автомат баталгаажуулалтыг унтраасны дараа тохиргоо дахин идэвхжсэн тохиолдол гарсан гэж мэдээлсэн байна. Тиймээс нэг төхөөрөмж дээр олон Google бүртгэл ашигладаг хүмүүс уг тохиргоог үе үе шалгаж байх нь зүйтэй.
Мөн дугаараа бүртгэлээс устгахаасаа өмнө тухайн дугаар нууц үг сэргээх эсвэл бүртгэл хамгаалах зориулалтаар ашиглагдаж байгаа эсэхийг шалгах хэрэгтэй. Хэрэв утасны дугаар нь сэргээх үндсэн арга бол өөр найдвартай сэргээх арга урьдчилан тохируулах нь тохиромжтой.
Ингэснээр хувийн болон ажлын Google бүртгэлүүд хооронд утасны дугаар хүсээгүй байдлаар холбогдох эрсдэлийг багасгаж, бүртгэлийн нууцлалын тохиргоогоо өөрөө илүү нарийн хянах боломжтой болно.
