АНУ-ын Нью-Мексико мужийн шүүх Facebook-ийн толгой компани Meta-г хэрэглэгчдийн хувийн мэдээллийн нууцлал болон платформын аюулгүй байдлын талаар олон нийтэд төөрөгдүүлсэн гэж үзэж, 25 тэрбум ам.долларын торгууль ногдуулсан тухай мэдээлжээ.
Энэ нь Meta компанийн эсрэг гарсан хамгийн өндөр дүнтэй шүүхийн шийдвэрүүдийн нэг болж байгаа бөгөөд компанийн зүгээс уг шийдвэрийг давж заалдахаар болсон байна.
Эх сурвалжийн мэдээлснээр өнгөрсөн сард тангарагтны шүүх Meta-г Нью-Мексико мужийн хэрэглэгчийн эрхийг хамгаалах хуулийг 43 сая гаруй удаа зөрчсөн гэж дүгнэжээ.
Тухайлбал, Facebook хэрэглэгчдийн хувийн мэдээлэлд ямар этгээд нэвтрэх боломжтой, мөн платформ дээрх хортой болон хууль зөрчсөн агуулгыг хэрхэн хянаж, зохицуулдаг талаар бодит байдлыг бүрэн илэрхийлээгүй гэж шүүх үзсэн байна.
Нью-Мексико мужийн ерөнхий прокурор Раул Торрез уг шийдвэрийн талаар:
“Технологийн компаниуд хуулиас дээгүүр байж болохгүй”
гэсэн утгатай байр суурь илэрхийлжээ.
Шүүхээс тогтоосон төлбөрийг Нью-Мексико мужийн боловсролын салбарын санд төвлөрүүлэхээр болсон талаар мөн мэдээлсэн байна.
Meta шийдвэрийг давж заалдана
Meta компани шүүхийн шийдвэрийг хүлээн зөвшөөрөхгүй байгаагаа илэрхийлж, давж заалдах ажиллагаа эхлүүлэхээр болжээ.
Компанийн хуулийн асуудал хариуцсан захирал Си Жей Махони давж заалдах шатны шүүх уг шийдвэрийг хүчингүй болгоно гэдэгт итгэлтэй байгаагаа мэдэгдсэн байна.
Иймээс одоогоор дурдагдаж буй 25 тэрбум ам.долларын төлбөр эцсийн дүн биш бөгөөд давж заалдах шатны шүүхийн шийдвэрээс хамааран өөрчлөгдөх боломжтой.
Энэхүү хэрэг 2021 оноос эхтэй бөгөөд Facebook хэрэглэгчдийн мэдээллийг зөвшөөрөлгүй ашигласан гэх Cambridge Analytica-гийн дуулиантай холбоотой гэж эх сурвалж мэдээлжээ.
Cambridge Analytica компани 87 сая хүртэлх Facebook хэрэглэгчийн хувийн мэдээллийг зөвшөөрөлгүй цуглуулж, улс төрийн зорилтот сурталчилгаанд ашигласан хэрэгт холбогдож байсан юм.
Мөн уг мэдээллийг Дональд Трампын 2016 оны Ерөнхийлөгчийн сонгуулийн кампанит ажилд ашигласан гэх мэдээлэл тухайн үед олон улсын хэмжээнд томоохон маргаан дагуулж байв.
Meta компанийн хувьд энэ нь Нью-Мексико мужид сүүлийн зургаан сарын хугацаанд гарсан хоёр дахь томоохон хэмжээний шүүхийн ялагдал гэж мэдээлжээ.
Өнгөрсөн гуравдугаар сард тус мужийн шүүх Meta-г хүүхэд, өсвөр үеийнхний аюулгүй байдлын талаар хэрэглэгчдэд төөрөгдүүлсэн мэдээлэл өгсөн гэж үзэн 375 сая ам.долларын торгууль ногдуулсан байна.
Үүний дараа наймдугаар сард өсвөр үеийнхний сэтгэцийн эрүүл мэндийг дэмжих мужийн санд 567 сая ам.доллар төлөх шийдвэр мөн гарчээ.
Хэрэв энэ удаагийн 25 тэрбум ам.долларын торгуулийн шийдвэр давж заалдах шатанд хэвээр үлдвэл Meta 2019 онд Facebook-т ногдуулсан таван тэрбум ам.долларын торгуулиас тав дахин өндөр хэмжээний төлбөр төлөх нөхцөл үүсэх юм.
