Шинэ зөөврийн компьютер авахдаа процессор, дэлгэц, санах ойн багтаамжаас гадна холболтын оролтууд хаана байрласныг шалгах хэрэгтэй. PCWorld-ийн нийтлэлч Майкл Крайдер USB-C портуудын байрлалд онцгой анхаарахыг зөвлөжээ. Түүний үзэж буйгаар их биеийн хоёр талдаа ийм оролттой загварууд ашиглахад хамгийн эвтэйхэн байдаг.
Ийм зохион байгуулалтын гол давуу тал нь цэнэглэгчийг аль ч талаас залгах боломж юм. Кафе, зочид буудал, тээврийн хэрэгсэл зэрэг газарт цахилгааны залгуур компьютерын зөвхөн баруун эсвэл зүүн талд таарах тохиолдол бий. Харин бүх оролт нэг талдаа байвал цэнэглэгчийн утсыг их биеийг нь тойруулан татах шаардлага гардаг.
Крайдер мөн дор хаяж хоёр USB-C порттой зөөврийн компьютер сонгохыг зөвлөсөн байна. Ингэснээр нэгийг нь цэнэглэхэд ашиглах зуур нөгөөгөөр нь гадаад санах төхөөрөмж, дэлгэц, док станц болон бусад нэмэлт хэрэгслийг холбож болно. Энэ нь адаптер байнга залгаж, салгах хэрэгцээг багасгана.
Өндөр үнэтэй загваруудад ч оролтын байрлалтай холбоотой ийм хүндрэл тохиолддог. Тухайлбал, Lenovo ThinkPad X1 Nano-ийн хоёр USB-C порт хоёулаа зүүн талдаа байрладаг. Asus Zenbook A14 мөн төстэй зохион байгуулалттай бөгөөд баруун талын USB-A оролтоор нь компьютер цэнэглэх боломжгүй. MacBook Air-ийн USB-C портууд ч нэг талдаа төвлөрсөн байдаг бол MacBook Pro-г хоёр өөр талаас цэнэглэх боломжтой.
Портуудыг ийнхүү байрлуулах нь төхөөрөмжийн дотоод хийцтэй холбоотой. Цэнэглэлт, өндөр хурдны өгөгдөл дамжуулалт, дүрсний дохио гаргах боломжийг нэгтгэсэн бүрэн ажиллагаатай USB-C порт нэмэхэд тусгай эд анги шаардлагатай болдог. Үүний зэрэгцээ дотоод хэлхээний хавтангийн зохион байгуулалт илүү төвөгтэй болж, үйлдвэрлэлийн өртөг нэмэгддэг байна.
Тиймээс худалдан авахаасаа өмнө USB-C портын тоог харахаас гадна тус бүр нь ямар үйлдэл дэмждэг, их биеийн хаана байрласныг нягтлах нь зүйтэй. Гэрээсээ гадуур байнга ажилладаг эсвэл олон нэмэлт төхөөрөмж холбодог хүмүүст хоёр талдаа порттой загвар өдөр тутмын хэрэглээг мэдэгдэхүйц хялбарчилж чадна.
