Netflix ба Spotify нэгдэн видео подкастын шинэ эрин үеийг эхлүүллээ

31

Хоёр технологийн аваргын хамтын ажиллагаа

Netflix компани анх удаа видео подкастын ертөнцөд нэвтрэхээр шийдэж, аудио стримингийн тэргүүлэгч Spotify-той хамтран ажиллахаа зарлалаа. Энэхүү түншлэл нь 2026 оноос эхлэн Spotify-ын бүтээсэн спорт, соёл урлаг, зугаа цэнгэл, гэмт хэрэг зэрэг сэдвийг хамарсан 16 подкастын видео хувилбарыг Netflix платформоор дамжуулан цацах боломжийг олгоно.

Хэлэлцээрийн гол зорилго нь видео подкастын өсөж буй зах зээлийг эзлэхийн зэрэгцээ Netflix-ийн хамгийн том өрсөлдөгч болох YouTube-д контент шилжихээс сэргийлэхэд чиглэж байна.

Контент түгээлтийн шинэ шат

Netflix-ийн контент хариуцсан дэд ерөнхийлөгч Лорен Смит энэхүү хамтын ажиллагааны талаар:

“Видео подкастууд улам бүр түгээмэл болж буй энэ үед Spotify-тай нэгдэх нь бидэнд эдгээр алдартай шоуны бүрэн хэмжээний видео хувилбарыг үзэгчдэд хүргэх боломж олгож байна. Энэ нь бүтээгчдэд шинэ боломж нээж, контент түгээлтийн цоо шинэ шатанд хүргэнэ.”

Spotify-ийн контент хариуцсан дэд ерөнхийлөгч Роман Васенмюллер мөн:

“Энэхүү гэрээ нь подкастын түүхэнд шинэ хуудсыг нээж байна” хэмээн онцоллоо.

Видео подкастын эрэлт өссөөр байна

Сүүлийн жилүүдэд видео подкастууд TikTok болон бусад сошиал платформууд дээр богино клип хэлбэрээр түгэх болсноор подкастын салбар эрс өөрчлөгдөж байна. АНУ-ын Cumulus Media-ийн судалгаагаар сонсогчдын 72% нь видео хэлбэртэй подкастыг илүүд үздэг болохыг тогтоожээ.

Подкастууд ихэвчлэн зар сурталчилгааны орлогоор ажилладаг ч видео подкастуудыг олон төрлөөр түгээж, олон нийтийн сүлжээнд хуваалцдаг болсноор тэдний жинхэнэ нөлөө, үзэгчийн оролцоо улам өргөжиж байна.

Дижитал контентийн ирээдүй

Ажиглагчдын үзэж буйгаар Netflix болон Spotify-ийн энэ түншлэл нь аудио болон дүрсний контентийн огтлолцлын шинэ зах зээлийг нээж, стримингийн салбарт томоохон өөрчлөлт авчрах төлөвтэй байна. Энэ нь подкаст бүтээгчдэд илүү өргөн хүрээний үзэгчидтэй холбогдох, хоёр талын платформд зэрэг агуулга түгээх шинэ боломжуудыг олгох юм.