38 тэрбум ам.долларын гэрээ — стратегийн түншлэл
Amazon болон OpenAI компаниуд долоон жилийн хугацаатай, нийт 38 тэрбум ам.долларын үнэлгээтэй гэрээ байгуулжээ. Энэхүү хамтын ажиллагаа нь OpenAI-д хиймэл оюуны системүүдийн асар их тооцооллын эрэлтийг хангах өргөтгөсөн серверийн хүчин чадал олгоно.
Хамтын ажиллагааны зорилго
Гэрээний хүрээнд Amazon компани “Nvidia GB200” болон “GB300” зэрэг шинэ үеийн AI чипүүдийг өргөнөөр ашиглах бөгөөд эдгээр нь OpenAI-ийн ChatGPT болон ирээдүйд хөгжүүлэх шинэ загваруудыг сургах гол дэд бүтэц болох юм.
Эдгээр чипүүдийг Amazon Web Services (AWS)-ийн дата төвүүдэд суурилуулснаар OpenAI өөрийн хэрэглэгчийн асуултанд илүү хурдан, нарийвчлалтай хариулах чадвартай системүүдийг хөгжүүлэх боломжтой болж байна.
Хөрөнгийн зах зээлд үзүүлсэн нөлөө
Гэрээний мэдээ гарснаар технологийн салбарын томоохон компанийн хувьцаанууд өсөлт үзүүлэв.
- Amazon компанийн хувьцаа 4.5%-иар өсч, хөрөнгө оруулагчдын итгэлийг нэмэгдүүлсэн бол
- Nvidia-гийн хувьцаа 3.3%-иар өссөн байна.
Эдийн засгийн шинжээчид энэхүү гэрээг “хиймэл оюуны хөгжлийн шинэ шатны түлхүүр хамтын ажиллагаа” хэмээн тодорхойлж, үүнтэй зэрэгцэн Amazon нь AI дэд бүтцийн тэргүүлэгч байр сууриа бататгаж, OpenAI илүү уян хатан тооцооллын экосистемд нэвтрэх боломжтой боллоо гэж дүгнэжээ.
