Grok 4.1: “Хүмүүжилтэй” хиймэл оюун ухаан тайзан дээр гарлаа

18

xAI компанийн шинэ загвар Grok 4.1 албан ёсоор нээлтээ хийж, зөвхөн хурд, нарийвчлал сайжирсан төдий бус, харин хүний зан төлөв, сэтгэл хөдлөлийг ойлгож хариулах чадвараараа тодорч байна. Шинэ хувилбар өмнөхөө бодоход илүү “амьд”, илүү хүний мэдрэмжтэй мэт санагдаж, энгийн чатбот биш, харин ухаантай танилтайгаа ярьж буй мэт сэтгэгдэл төрүүлж байна. Нэг үгээр хэлбэл – энэ загвар бага зэрэг “дөж” ааштай, гэхдээ тун сонирхолтой болсон.

Шинэ загвар чансааны жагсаалтыг тэргүүлж эхэллээ

Grok 4.1 танилцуулагдаад хэдхэн цагийн дотор хиймэл оюун ухааны чансааны хоёр том платформ дээр шууд оргилд гарлаа.

LMArena дээрх текстийн чансаанд уг загвар 1483 оноо авч, нийтэд нээлттэй байгаа бүх чат моделийг ардаа орхижээ. Харин сэтгэл хөдлөлийн оюун ухаан, хүний зан төлөв, харилцааны өнгө аяс дээр голчлон үнэлдэг EQ-Bench3 шалгуурт өмнө нь Claude Sonnet 3.7 загварын барьж байсан эхний байрыг эзэлсэн байна.

Энэ нь Grok 4.1 зөвхөн “ухаантай хариулах”-аас гадна хүний сэтгэл хөдлөл, ааш араншинг илүү сайн уншиж, илүү зохистой, хүний шүүлтүүртэй мэт хариу өгч чаддаг болж байгааг харуулж байна.

“Хүний” өнгө аяс: илүү зөөлөн, илүү хошин, илүү “ойр”

Grok 4.1-ийн гол шинэчлэлт нь сэтгэл хөдлөлийн мэдрэмж болон бичвэрийн чанарт төвлөрчээ. Яриа нь өмнөх хувилбаруудаас илүү байгалийн, хариултууд нь хуурай техниктэй чатботоос илүүтэй жижигхэн эмпатитай, багахан хошигнол шингэсэн, хүнтэй төстэй харилцаатай болсон гэж ашиглагчид дүгнэж байна.

Жишээ нь, Сан Франциско руу аялах зөвлөгөө асуухад хөтөч номын өгүүлбэр шиг биш, харин тэнд амьдардаг найз чинь “энд ингэж явбал гоё, харин тэнд жаахан түгжрээтэй байдаг шүү” гэх маягийн уян хатан, амьд хэлбэрээр ярьж өгнө. X дээрх хошин пост, сошиал трендийн талаар асуухад ч зүгээр нэг дүн шинжилгээ бус чансаатай найзын сэтгэгдэл шиг өнгө аяс ажиглагдаж байгаа аж.

xAI-ийн тайлбарласнаар, Grok 4.1-ийг сургах явцад “хиймэл оюуны багш”-ийн тоог нэмэгдүүлж, загварын хэв маяг, өнгө аяс, харилцах арга барилыг тусгайлан нарийн тохируулснаар ийм “хүмүүжилтэй” стилийг гаргаж чаджээ.

Сул тал: бага зэрэг шударга бус, арай зоригтой, илүү “эрсдэлтэй”

Гэхдээ шинэчлэл зөвхөн эерэг талтай биш. Grok 4.1-ийн загварын танилцуулгад дурдсанаар, өмнөх хувилбартай харьцуулахад шударга бус байдал, заль мэхтэй хандлагын үзүүлэлт бага зэрэг өссөн байна.

Мөн:

• “Сэтгэх горим”-д (Reasoning mode) орсон үедээ эргэлзээтэй, эмзэг сэдвийг илүү гүн ухаж судлахад бэлэн,
• API-ээр дамжуулсан prompt injection буюу шуурхай тарилгын халдлагад өмнөх хувилбараасаа арай илүү өртөмтгий ханддаг гэдгийг тэмдэглэжээ.

Эдгээр нь загварын илүү илэрхийлэлтэй, бага шүүгдсэн, бага цензуртэй байлгах гэсэн зорилготой шууд холбоотой. Өөрөөр хэлбэл xAI Grok 4.1-ийг илүү чөлөөтэй, илүү шууд яригч хиймэл оюун ухаан гэж байршуулж байгаа тул зарим эрсдэл дагалдах нь ойлгомжтой гэж үзэж байна.

Тиймээс хэрэглэгчид илүү “амьд” харилцааны хариуд бага зэрэг эрсдэлтэй байж мэдэх талуудыг анхаарч үзэх шаардлагатай хэвээр байна.

Хэрэглэж үзэхэд бэлэн: Grok 4.1 хаа сайгүй нээгдлээ

Шинэ загвар одоо вэб хувилбар болон X апп-аар дамжуулан шууд ашиглах боломжтой болсон. Хэрэв та Grok ашигладаг бол модел сонгох хэсгээс Grok 4.1-ийг сонгож, хуучин хувилбартай нь өөрөө харьцуулан туршиж болох юм.

Одоогийн байдлаар олон нийтийн жагсаалтад хамгийн өндөр үнэлгээтэй загварын байр суурийг эзлээд байна. Анхны сэтгэгдлүүдээс харахад Grok 4.1 нь зөвхөн “тархи”-аараа ажиллах биш, таны сэтгэл хөдлөл, асуултын араас буй утга, сэтгэл зүйг ч мэдэрч харилцах гэж оролдож буй хиймэл оюун ухаан болжээ.