Apple дараагийн үеийн AirTag дээр идэвхтэй ажиллаж байгаа бөгөөд үүнтэй зэрэгцэн HomePod mini-д зориулсан жижиг хэмжээний шинэчлэлтийн бэлтгэлээ ч хийж буй нь тодорхой болж байна. Албан бус эх сурвалжуудын мэдээллээр шинэ AirTag-ийг анх 2025 онд танилцуулахаар төлөвлөж байсан ч хугацаа нь хойшилж, 2026 оны эхний хагаст нээлтээ хийх магадлалтай болсон аж.
AirTag 2-ын гол өөрчлөлтүүд
Шинэ AirTag нь хамгийн түрүүнд холболтын тогтвортой байдал, үр ашиг дээр төвлөрөх төлөвтэй. Үүнтэй зэрэгцэн Precision Finding горимын нарийвчлал илүү сайжирч, алдагдсан зүйлийн байршлыг илүү бодитой, нарийн заах боломж нэмэгдэх аж. Мөн батарейны түвшнийг өмнөхөөсөө илүү дэлгэрэнгүй, нарийн мэдрэмжтэйгээр харуулах шинэ систем нэвтрэхээр яригдаж байна. Үүн дээр нэмээд Improved Moving гэх нэртэй шинэ боломжийн тухай дурдагдаж байгаа бөгөөд энэ нь трекер хөдөлгөөнтэй үед ч бодит байршлыг илүү оновчтой тодорхойлох зорилготой юм.
Түүнчлэн олон хүн, олон төхөөрөмж нэг дор ажилладаг, дохио ихээр давхацдаг орчинд хайлтын нарийвчлалыг нэмэгдүүлэх чиглэлээр Apple тусгайлан анхаарч ажиллаж буй нь мэдээллээс харагдаж байна.
Хуучин AirTag-д шинэ боломжууд нэмэгдэх үү?
Шинэ функцүүдийн аль нь программ хангамжийн шинэчлэлтээр дамжин эхний үеийн AirTag дээр нэмэгдэх нь одоогоор тодорхойгүй хэвээр байна. Ялангуяа Precision Finding-ийг мэдэгдэхүйц ахиулахын тулд шинэ UWB чип шаардлагатай байж болзошгүй гэсэн таамаг яригдаж байгаа тул өмнөх үеийн төхөөрөмжүүд тодорхой боломжуудыг авч чадахгүй үлдэх эрсдэлтэй.
HomePod mini: “их биш, гэхдээ хэрэгтэй” шинэчлэлт
HomePod mini-ийн хувьд өөрчлөлт харьцангуй бага байх төлөвтэй. 2020 оноос хойш ашиглаж ирсэн S5 процессорыг S10 чипээр солих нь гол шинэчлэлт болж магадгүй байна. Гэхдээ шинэ чип орж ирлээ гээд Apple Intelligence-ийн дэмжлэг бодитоор нэмэгдэх эсэх нь одоогоор тодорхой зураглалгүй, тиймээс “том үсрэлт” хүлээхэд эрт гэж эх сурвалжуудын өнгө аясаас уншигдаж байна.
